የ12ኛ ክፍል ፈተና ጉዳይ !

የ12ኛ ክፍል ሀገር አቀፍ ፈተና መሰጠት ከጀመረ ዛሬ 3ኛ ቀኑን ይዟል። ፈተናው በነገው ዕለት ይጠናቀቃል።

ፈተናው መሰጠት በጀመረበት ሰኞ ኅዳር 29/2024 ዓ.ም ፈተናው ተሰርቋል የሚሉ ወሬዎች ቢናፈሱም፤ ፈተናው አለመሰረቁን የትምህርት ሚኒስትሩ ፕ/ር ብርሃኑ ነጋ አሳውቀው እንደነበር አይዘነጋም።

"ተማሪዎች ተረጋግተው ይፈተኑ" በሚል ይመስላል መንግስት የማህበራዊ ሚዲያዎችን ቢያግዳቸውም የተለያዩ ዘዴዎችን በመጠቀም ከፈተና ክፍል ውስጥ የተነሱ ፎቶዎች ባለፉት 2 ቀናት በቴሌግራም ግሩፖች ላይ ሲዘዋወሩ ታይተዋል።

ትላንት ለሊት አንስቶ ግን ዛሬ የተሰጡት (የባዮሎጂ፣ ታሪክና ኬሚስትሪ) ፈተናዎች ቀድመው በማህበራዊ ሚዲያ ላይ መውጣታቸውን ቲክቫህ ኢትዮጵያ ለማረጋገጥ ችሏል።

ቲክቫህ ኢትዮጵያ ከፈተናው ጋር በተያያዘ በርካታ የቤተሰቡ አባላት የሰጡትን ጥቆማ እና ትላንት የተለያዩ ግሩፖች ላይ የተለጠፉትን የፈተና ወረቀቶች (በPDF እንዲሁም በፎቶ) በመያዝ ዛሬ ከፈተናው በኃላ ባደረገው ማጣራት ፈተናዎቹ እራሳቸው ሆኖ አግኝቷቸዋል።

ከበቂ #ማስረጃ ጋር ለማረጋገጥ የቻልነው የዛሬው ፈተና ለተፈታኞች ከመሰጠቱ ከሰዓታት በፊት ቀደም ብሎ በማህበራዊ ሚዲያ ላይ መውጣቱን ነው።

ቴሌግራምን ጨምሮ ማኅበራዊ ትስስር ገፅ ፈተናው ከጀመረ ቀን ጀምሮ ቢቋረጥም በቀላሉ በ VPN ግንኙነቱን ማስቀጠል በመቻሉ ተማሪዎች ሲቀባበሉት አስተውለናል።

ለዓመታት የደከሙ ተማሪዎችን ልፋት ከንቱ በሚያስቀርና ትውልድን በሚገድል ድርጊት የተሳተፉ፣ የሚተባበሩ፣ የሚያጋሩ አካላት ከዚህ ድርጊታቸው ሊታቀቡ ይገባል።

መንግስት ይህንን ፈትሾ ተጠያቂ መሆን ያለበትን አካል በአፋጣኝ ማሳወቅ ይኖረበታል ሲሉ የቲክቫህ ቤተሰብ የሆኑ ተማሪዎችና የተማሪ ወላጆች ጥሪ አቅርበዋል።

@tikvahethiopia

#StateofEmergencyEthiopia

የአስቸኳይ ጊዜ አዋጅ ዕዝ መግለጫ ቁ.2 !

የአስቸኳይ ጊዜ ዐዋጅ ዕዝ አዋጁ ከወጣበት ጊዜ ጀምሮ ያለውን ሀገራዊ ሁኔታ እና የአዋጁን አፈጻጸም ትላንት ማምሻውን መገምገሙን አሳውቋል።

ዕዙ ለኅብረተሰቡ የቀረበውን ሀገራዊ ጥሪ ምላሽ፣ የአዋጁን አፈጻጸም እና ወታደራዊ ርምጃዎች በመገምገም የተለያዩ ድሎች መመዝገባቸውን ማረጋገጡን ገልጿል።

የአስቸኳይ ጊዜ አዋጅ ዕዝ " በአማራና በአፋር ክልሎች የክተት አዋጁን ተከትሎ በጠላት ላይ እየተወሰደ ያለው ርምጃ አመርቂ ሆኖ ተገኝቷል" ብሏል።

" ለዚህ መሠረቱ የሕዝቡ በከፍተኛ ሁኔታ መነሣሣትና ከጸጥታ አካላት ጋር በመቀናጀት የፈጠረው ንቅናቄ መሆኑ ተረጋግጧል " ሲል ገልጿል።

የአስቸኳይ ጊዜ አዋጅ ዕዝ ፥ በኦሮሚያ ክልል በሰሜን ሸዋ፣ በምዕራብ ሸዋ፣ በሆሮጉድሩ እና በምሥራቅ ወለጋ አንዳንድ ወረዳዎች በአሸባሪ ቡድኑ ሸኔ ላይ በክልሉ ልዩ ኃይልና ሚሊሻ ፣ የፌዴራል ፖሊስ እና ሀገር መከላከያ በጋራ ከፍተኛ ድል ተጎናፅፈዋልም ብሏል።

ዕዙ ድሉን ለማስቀጠል 3 ትእዛዞችን ማስተላለፉንም ገልጿል።

(ዝርዝር መግለጫው ከላይ ተያይዟል)

@tikvahethiopia

#ተጨማሪ

ትላንት የተሰጡት የታሪክ ፣ ኬሚስትሪ እና ባዮሎጂ ፈተናዎች ከፈተናው በፊት ቀድሞ በማህበራዊ ሚዲያ ላይ መሰራጨቱን ቲክቫህ ኢትዮጵያ በቂ ማስረጃ ማረጋገጡ ይታወሳል።

ዛሬ የተሰጠውም የስነ-ዜጋ እና ስነ-ምግባር (ሲቪክ) ትምህርት ከትላንት ምሽት ጀምሮ በማህበራዊ ሚዲያ ላይ ሲሰራጭ እንደነበርና ዛሬ የተሰጠው የፈተና ወረቀትም ትላንት ማህበራዊ ሚዲያ ላይ ከተሰራጨው ጋር ተመሳሳይ መሆኑን በበቂ ማስረጃ አረጋግጠናል።

ኢትዮጵያ ውስጥ የማህበራዊ ሚዲያዎች ቢዘጉም የተለያዩ መንገዶችን በመጠቀም አገልግሎቶቹ ቀጥለዋል።

ይህ ትውልድና እና ኢትዮጵያን የመግደል ተግባር በማን እና እንዴት እንደተፈፀመ ግልፅ ማብራሪያ የሚፈልግ ሲሆን በዚህ ሂደት ውስጥ ተጠያቂው አካል መታወቅ ይኖርበታል።

ለዓመታት የለፉ ተማሪዎችን ድካም በሚያደናቅፍ ተግባር ላይ የተሳተፉ፣ ሲተባበሩ የነበሩ፣ ማህበራዊ ሚዲያ ላይ ሲያጋሩ የነበሩ ሁሉ ሌላው ቢቀር ከሞራል ተጠያቂነት አይተርፉም።

በውጭ ያሉ የማህበረሰብ አንቂ ነን የሚሉ አካላትም ሆነ የፖለቲካ ሰዎች ከምንም ጋር ግንኙነት የሌላቸው ተማሪዎችን የግል የፖለቲካ ትርፍ ለማግኘት ብቻ ሲሉ ኢ-ስነምግባራዊ በሆነ ትውልድን የመጉዳት ተግባር ላይ መሳተፋቸው እጅጉን የሚያሳዝን ነው።

የ12ኛ ክፍል ሀገር አቀፍ ፈተና ዛሬ ተጠናቋል።

ቲክቫህ ኢትዮጵያ ፥ ትምህርት ሚኒስቴር ስለጉዳዩ የሚለው ነገር ካለና ማብራሪያ ከሰጠ ተከታትሎ ያሳውቃል።

@tikvahethiopia

#GONDAR : ፖሊስ በጎንደር ከተማ ለእኩይ/ለሽብር ተግባር ሊውል ነበረ ያለውን ገጀራ በቁጥጥር ስር ማዋሉን ገለፀ።

ገጀራው በከተማው ቀበሌ 16 በተለምዶ ግሩፕ እየተባለ በሚጠራው አካባቢ ግለሰብ ቤት ውስጥ በተደረገ ፍተሻ የተገኘ ነው ተብሏል።

ማህበረሰቡ ባደረሰው ጥቆማ ከአንዲት ግለሰብ መኖሪያ ቤት ውስጥ ህገወጥ ገጀራው መገኘቱን ያስረዳው የከተማው ፖሊስ ጥቆማ የተሰጠባት ግለሰብ ቤት ፖሊስ ሄዶ ህገወጥ ገጀራ መኖሩን ሲጠይቅ ምንም ነገር እንደሌለ መግለጿ ተመላክቷል።

ነገር ግን በተደረገው ፍተሻ በአልጋ ስር በከፍተኛ ሁኔታ የተደበቁ ገጀራዎች መገኘቱን እና ገጀራው ከዚህ ቀደም አገልግሎት ላይ ያልዋለና ለእኩይ አላማ ሊውል እንደታሰበ ያመለክታል ብሏል ፖሊስ።

የጎንደር ፖሊስ አሁን ላይ ነባራዊ ሁኔታውን መሰረት ባደረገ ሁኔታ በሮችን ከሁሉም የፀጥታ ኀይል ጋር በመሆን 24 ሰዓት እየጠበቀ መሆኑን ወንጀልንና ወንጀለኞችን መከላከልና መቆጣጠር ላይ እንደሚገኝ ገልጿል።

በቀጣይም ከማህበረሰቡ ጋር በመሆን መሰል ህገወጦችን በቁጥጥር ስር እያዋልነ ወደ ህግ የማቅረብ ተግባሩ እንደሚቀጥል አሳቋል።

ምንጭ ፦ የጎንደር ከተማ 4ኛ ዋና ፖሊስ ጣቢያ የማህበረሰብ የማህበረሰብ አቀፍ ፖሊስ አገልግሎት ክፍል

@tikvahethiopia

#መግለጫ

የ12ኛ ክፍል ብሄራዊ ፈተና መጠናቀቅን ተከትሎ የሀገር አቀፍ ትምህርት ምዘናና ፈተናዎች ኤጀንሲ መግለጫ ሰጥቷል።

ኤጀንሲው የ2013 ትምህርት ዘመን የመጀመሪያ ዙር የ12 ክፍል ብሄራዊ ፈተና በሰላም ተጠናቅቋል ብሏል።

የሀገር አቀፍ የትምህርት ምዘና እና ፈተናዎች ኤጀንሲ ምክትል ዋና ዳይሬክተር አቶ ተፈራ ፈይሳ በሀገራችን ካለው ወቅታዊ ሁኔታ አንፃር ፈተናው በተሳካ ሁኔታ ተጠናቋል ሲሉ ነው ያሳወቁት።

በ2 ሺ 36 የፈተና ጣቢያዎች በተሰጠው በዚህ ፈተና፣ ፈተናውን ይወስዳሉ ተብሎ ከታሰበው 617 ሺ 991 ተማሪዎች ውስጥ 565ሺ 255ቱ ፈተናውን ወስደዋል ብለዋል።

ምክትል ዋና ዳይሬክተሩ በዚህ የህልውና ትግል ወቅት ፈተናው በሰላም እንዲጠናቀቅ የበኩላቸውን ለተወጡ የፀጥታ አካላት፣ የትምህርት ዘርፉ ሰራተኞችና ወላጆች ምስጋናቸውን አቅርበዋል።

"በማህበራዊ ሚዲያ አንዳንድ ፈተናዎች ተሰርቀው ወጥተዋል የሚባለው ጉዳይ እውነት ነወይ" ተበለው በጋዜጠኞች የተጠየቁት ዋና ዳይሬክተሩ፣ የተለያዩ ምርምርራዎችና ትንተናዎች ተደርገው አስፈላጊው ማስተካከያ ስለሚደረግ ምንም የሚያስጋ ነገር የለም የሚል ምላሽ ሰጥተዋል።

በተለያዩ ችግሮች ምክንያት ፈተና ያልተሰጠባቸው አካባቢዎች ለተማሪዎቹ የስነ ልቦና ግንባታ ስራ ተሰርቶ በሁለተኛ ዙር በመፈተን ከመጀመሪያው ዙር ተፈታኞች ጋር ወደ ዩኒቨርሲቲ ይገባሉ ተብሏል።

ምንጭ፦ ትምህርት ሚኒስቴር

@tikvahethiopia

#SUDAN : የሱዳን ጦር መሪ ሌ/ጄ አብዱል ፈታህ አል ቡርሃን አዲስ ሉዓላዊ ምክር ቤት አቋቋሙ፡፡

ቡርሃን ምክር ቤቱን ያቋቋሙት በመፈንቅለ መንግስቱ የፈረሰውን ሉዓላዊ የሽግግር ምክር ቤት ለመተካት ነው፡፡

አዲስ የተመሰረተው ምክር ቤት 15 አባላት ያሉት ሲሆን ሉዓላዊ የሽግግር ምክር ቤቱን ሲመሩት የነበሩት ቡርሃን ራሳቸውን የአዲሱ ም/ቤት መሪ አድርገው ሾመዋል፡፡

ሉዓላዊ የሽግግር ምክር ቤቱን በምክትልነት ሲመሩ የነበሩት ጄነራል መሃመድ ሃምዳን ዳገሎ (ሄሚቴ)ም በአዲሱ ምክር ቤት ምክትል መሪነት እንደሚቀጥሉ ቡርሃን አስታውቀዋል፡፡

ከ15ቱ የምክር ቤቱ አባላት መካከልም 5ቱ የሃገሪቱ ጦር መሪ ጄነራሎች ናቸው፡፡

የሱዳን ጦር ከ20 ቀናት በፊት በጠቅላይ ሚኒስትር አብደላ ሀምዶክ በሚመራው የሲቪል አስተዳድሩ ላይ መፈንቅለ መንግስት መፈጸሙ ይታወሳል፡፡

መፈንቅለ መንግስቱን ተከትሎም የሲቪል አስተዳድሩ ወደ ቀድሞ ስልጣኑ እንዲመለስ የሱዳን ዜጎች በሰላማዊ ሰልፍ በመጠየቅ ላይ ናቸው፡፡

ምንጭ፦ አል ዓይን

@tikvahethiopia