በዚህ ሳምንት የተከሰቱ እሳት አደጋዎች፦

በዚህ ሳምንት በይፋ የተገለፁ /ስለደረሱት አደጋዎች መረጃ በሚዲያ ላይ የተሰራጨ ሶስት የእሳት አደጋዎች መከሰታቸውን ተመልክተናል።

#MgandoCity

በጉጂ ዞን መጋዶ ከተማ የካቲት 23 በደረሰ የእሳት አደጋ 6 ሚሊዮን 5 መቶ ሺህ ብር የሚገመት ንብረት አውድሟል። የእሳት አደጋው 29 መኖሪያ እና የንግድ ቤቶችን አቃጥሏል።

19 አባወራዎች ንብረታቸው ሙሉ ለሙሉ ወድሞባቸዋል።

የአደጋው መንስኤ እየተጣራ ነው።

#DebrebrhanCity

በደብረብርሃን ከተማ የካቲት 24 በደረሰ የእሳት አደጋ ግምቱ ያልታወቀ ንብረት ወድሟል።

አደጋው ከቀኑ 9 ሰዓት ተኩል በከተማው ቀበሎ 03 ቀጠና 1 ነው የደረሰው።

የእሳት አደጋው ንብረት አውድሟል ፣እንሰሳትን ገድሏል።

በእሳት አደጋው አንድ ባህላዊ ፎቅ ቤት ፣ ሁለት ቆርቆሮ ቤቶች ፣ ሁለት የሳር ቤቶችና አንድ ኩሽና ተቃጥለዋል ፤ በውስጣቸው የነበረ ንብረት ሙሉ በሙሉ ወድሟል።

በተጨማሪ የከብቶች እና የዶሮች መኖ ተቃጥሏል ፣ግምታቸው ያልታወቀ በጎች ፣ ቁጥራቸው በትክክል ያልተገለጸ ዶሮች በአደጋው ተቃጥለዋል።

የአደጋው መንስዔ እየተጣራ ነው።

#SouthBenchWoreda

ትላንት የካቲት 26 ምሽት በደቡብ ቤንች ወረዳ ጌሊት ቀበሌ የእሳት አደጋ ተከስቷል።

የተከሰተው የእሳት አደጋ በቤት እና ንብረት ላይ ውድመት አድርሷል።

የእሳት አደጋው የ6 ግለሠቦች መኖሪያ ቤቶችን እንዲሁም የተለያየ አገልግሎት የሚሠጡ ቤቶች ላይ ጉዳት አድርሷል።

የእሳት አደጋው መንስኤና ያወደመው ንብረት እየተጣራ ነው።

* ዛሬ የካቲት 27 ደግሞ ሎግያ ፒያሳ አከባቢ የእሳት አደጋ ተከስቶ እንደነበር ጥቆማ ደርሶናል፤ ስለአደጋው ዝርዝር መረጃ ይፋ አልተደረገም።
@tikvahethiopiaBot @tikvahethiopia

በሁለተኛ ዙር የ40/60 ዕጣ የወጣላችሁ ባለዕድለኞች ፦

የአ/አ ከተማ አስተዳደር በሁለተኛ ዙር 40/60 ዕጣ የወጣባቸውን ቤቶች ከፊታችን ሰኞ የካቲት 29/2013 ዓ.ም ጀምሮ በአፈፃፃማቸው የተሻሉ የግንባታ ሳይቶችን ለባለ ዕድለኞች ቁልፍ ርክክብ ለማድረግ ዝግጅት ማጠናቀቁን ዛሬ ምሽት አስታውቋል።

ባለእድለኞች ከፊታችን ሰኞ የካቲት 29/2013 ዓ.ም ጀምሮ በአፈፃፃማቸው የተሻሉ የግንባታ ሳይቶችን የአዲስ አበባ ከተማ ቤቶች ልማት ኮርፖሬሽን በየቅርንጫፍ ጽ/ቤቱ በሚያወጣው የጊዜ ሰሌዳ መሠረት የቤቶቹን ቁልፍ ለባለ ዕድለኞች ርክክብ የሚያደርግ ይሆናል ተብሏል።

በሚወጣው የጊዜ ሰሌዳ መሠረት ቁልፍ የሚረከቡ ባለ ዕድለኞች የቤቶቹን ቀሪ የማጠናቀቂያ ሥራዎች ማሰራት የሚችሉ መሆኑን የከተማ አስተዳደሩ ገልጿል።

በመጀመሪያ ዙር ላይ የተካተቱ 220 ህንፃዎች የሚገኙበት የግንባታ ሳይቶች ዝርዝር የሚከተለው ነው ፦

1. መሪ ሎቄ (14 ህንፃዎች)
2. እህል ንግድ (5 ህንፃዎች)
3. ህንፃ አቅሪቢ (8 ህንፃዎች)
4. አስኮ (13 ህንፃዎች)
5. አያት 1 ሳይት 1 (14 ህንፃዎች)
6. አያት 1 ሳይት 2 (38 ህንፃዎች)
7. አያት 1 ሳይት 3 (41 ህንፃዎች)
8. አያት 1 ሳይት 4 (39 ህንፃዎች)
9. ሰሚት (8 ህንፃዎች)
10. ቦሌ ቡልቡላ ሎት 1 (27 ህንፃዎች)
11. ቦሌ ቡልቡላ ሎት 2 (13 ህንፃዎች)

Via Addis Ababa Press Secretary
@tikvahethiopia @tikvahethiopiaBOT

የመጀመሪያዎቹ የኮቪድ-19 ክትባቶች ቦሌ አለም አቀፍ አየር ማረፊያ ደረሱ !

ኢትዮጵያ በኮቫክስ የግዢ ስርዓት የተገኙ የመጀመሪያዎቹን 2 ነጥብ 2 ሚሊዮን ክትባቶች ተቀበለች።

ክትባቶቹ በህንዱ ሴረም ኢንስቲትዩት የተመረቱ የአስትራ ዜኔካ ክትባቶች ናቸው።

በኢትዮጽያ አየር መንገድ ተጭነው ዛሬ ጠዋት ቦሌ አለም አቀፍ አየር ማረፊያ በደረሱ ጊዜ የጤና ሚኒስትሯን ዶ/ር ሊያ ታደሰን ጨምሮ ከፍተኛ የአፍሪካ ህብረት የአውሮፓ ህብረት እና ሌሎችም የመንግስታቱ ድርጅት ባለስልጣናት ተገኝተዋል።

ኢትዮጵያ የመጀመሪያዎቹን ክትባቶች በማግኘቷ "እንኳን ደስ ያላችሁ" ያሉት ዶ/ር ሊያ ታደሰ በክትባቶቹ የግዢ ሂደት ያደረጉ አጋር አካላትን አመስግነዋል።

ክትባቶቹ ቫይረሱን በመዋጋት ረገድ ግንባር ቀደም ለሆኑት የጤና ባለሙያዎች እና ሌሎችም የሚሰጡ ይሆናል።

ምንጭ ፦ አል ዓይን (ፎቶ - አብመድ)
@tikvahethiopiaBot @tikvahethiopia

እነ አቶ ጃዋር የረሃብ አድማቸውን ለማቆም ተስማሙ።

በረሃብ አድማ ላይ ለበርካታ ቀናት መቆየታቸው የተነገረው እነ አቶ ጃዋር መሐመድ ከነገ፣ ሰኞ የካቲት 29 2013 ዓ.ም ጀምሮ የረሃብ አድማቸውን ለማቆም መስማማታቸውን ጠበቆቻቸው ለቢቢሲ ተናግረዋል።

ከነገ፣ ሰኞ የካቲት 29 2013 ዓ.ም ጀምሮ የረሃብ አድማውን የሚያቋርጡት በላንድማርክ ሆስፒታል የሚገኙት አቶ ጃዋር መሐመድ፣ አቶ በቀለ ገርባ እና አቶ ሐምዛ አዳነ መሆናቸውን ጠበቆቻቸው አቶ ቱሊ ባይሳ እና አቶ ገመቹ ጉተማ አረጋግጠዋል።

ጠበቃው አቶ ገመቹ ጉተማ እነ አቶ ጃዋር የረሃብ አድማ ማድረግ ከጀመሩ ዛሬ 39ኛ ቀናቸው መሆኑን ጨምረው ተናግረዋል።

እነ አቶ ጃዋር መሐመድ የረሃብ አድማውን እያደረጉ ያሉት በፖለቲከኞች ላይ የሚደርሰውን እንግልት እና እስር፣ እነሱን ለመጠየቅና የችሎት ሂደታቸውን ለመከታተል ወደ ፍርድ ቤት በሚመጡ ሰዎች ላይ የሚፈጸም እስር እና ወከባ እንዲቆም ለመጠየቅ ነው።

"ትናንት ከ20 በላይ የአገር ሽማግሌዎች እና ፖለቲከኞች በሆስፒታሉ ተገኝተው ነበር። ይሁን እንጂ ወደ ሆስፒታሉ እንዲገቡ አልተፈቀደላቸውም ነበር። ዛሬ ዳግም ወደ ሆስፒታሉ በመምጣት ከሽማግሌዎቹ ኮማንደር ደራርቱ ቱሉ እና ሱፐር ኢንቴንደንት ሁሴን ሸቦ ወደ ሆስፒታሉ ገብተው የረሃብ አድማውን አንዲያቆሙ ተማጽነዋቸዋል" ብለዋል ጠበቃው አቶ ገመቹ።

እነ አቶ ጃዋር ከነገ፣ ሰኞ ጀምሮ የረሃብ አድማውን ለማቋረጥ የተስማሙት የረሃብ አድማ ማድረግ የጀመሩበት ጥያቄያቸው ምላሸ አግኝቶ ሳይሆን፤ "ሃኪሞቻቸው፣ የአገር ሽማግሌዎች እና ፖለቲከኞች ባደረጉት ልመና፣ ጫና በርትቶባቸው ነው። እሺታቸውን ለሽማግሌዎች ሰጥተዋል። ከነገ ጀምሮ የረሃብ አድማቸውን ያቆማሉ" ብለዋል አቶ ገመቹ።

ምንጭ፦ ቢቢሲ
@tikvahethiopiaBOT @tikvahethiopia