#SouthWollo : የደቡብ ወሎ ዞን አደጋ መከላከል እና ምግብ ዋስትና ፅ/ቤት ከሰሞኑን በደቡብ ወሎ ዞን አንዳንድ አካባቢዎች በአዲስ በተቀሰቀሰው ጦርነት ብቻ ከ250 ሺህ በላይ ወገኖች መፈናቀላቸውን አመልክቷል።

የፅ/ቤቱ ኃላፊ አቶ መሳይ ማሩ ዛሬ ለጀርመን ድምፅ በሰጡት ቃል ፥ ካለፈው ሳምንት መጀመሪያ ጀምሮ እንደአዲስ በተቀሰቀሰ ጦርነት በደቡብ ወሎ ዞን በርካቶች ከቀያቸው እየተፈናቀሉ ነው ብለዋል።

የተፈናቃይ ቁጥር ከቀን ወደቀን እየጨመረ ነው ያሉት አቶ መሳይ ፤ እየተፈናቀሉ ያሉት አረጋውያን፣ ሴቶች እና ህፃናት ፤ ከዛሬ ነገ ችግሩ ይፈታል ብለው ጫካ ለጫካ የቆዩ ወገኖች ናቸው ብለዋል።

ከዚህ በፊት በደሴ ከተማ 450 ሺህ ተፈናቃዮች የነበሩ ሲሆን አሁን ግን የተፈናቃዮች ቁጥር 700 ሺ መድረሱን አመልክተዋል።

ኃላፊው ፥ ተፈናቃዎችን ለማስተናገድ መጠለያ ከፍተኛ ችግር መሆኑን አንስተዋል፤ ከዚህ ቀደም 24 ትምህርት ቤቶች ተፈናቃዮችን ይዘው የነበረ ሲሆን አሁን ላይ 45 ት/ቤት ደርሷል።

ከት/ቤት በተጨማሪ የመንግስት ሼድ ፣ የግል ሼድ ፣ የተጀመሩ የመንግስት የቢሮ ግንባታዎች ጭምር ለተፈናቃይ መጠለያ እንዲሆን እየተደረጉ መሆኑንም አክለዋል።

በተለይ መርሳ፣ ድሬ ሩቃ ከሚባሉ አካባቢዎች አጠቃላይ ሊባል በሚችል ደረጃ ህዝቡ አካባቢውን ጥሎ መምጣቱን ገልፀው ፤ ከባቲ እስከ ሀርቡ የመንግስት ት/ቤቶች በተፈናቃዮች ተይዘዋል ሲሉ ለሬድዮ ጣቢያው ተናግረዋል።

Photo : File (Dessie Commu.)

@tikvahethiopia