#የምስራች🎉

የአባይ ውሃ ለሦስተኛ ጊዜ በታላቁ የኢትዮጵያ ሕዳሴ ግድብ አናት ላይ መፍሰስ ጀምሯል፡፡

በግድቡ ግንባታ ላይ የተሳተፉ ባለሙያዎችም የደስታ ስሜታቸውን ገልፀዋል።

የኢትዮጵያ ኤሌክትሪክ ኃይል ከለውጡ በኋላ በፕሮጀክቱ ላይ በተወሰደው የማስተካከያ እርምጃ በግድቡ ውስጥ መተከል የነበረባቸው የውሃ ማስተላለፊያ የብረታ ብረት ስራዎች ተጠናቀው የግድቡን የመካከለኛው ክፍል ከፍታ ከባህር ጠለል በላይ ስድስት መቶ ሜትር እንዲሁም ግራና ቀኙን ስድስት መቶ አስራ አንድ ሜትር ማድረስ መቻሉን ገልጿል።

ከሶስት ዓመት በፊት ለዘመናት ከባህር ጠለል በላይ በአምስት መቶ ሜትር ከፍታ ላይ ይፈስ የነበረው የአባይ ወንዝ ዛሬ ለሦስተኛ ዙር በግድቡ አናት ላይ የፈሰሰው ከባህር ጠለል በላይ በስድስት መቶ ሜትር ከፍታ ላይ መሆኑን አሳውቋል።

በአሁኑ ወቅት የግድቡ ግራና ቀኝ ጠርዝ ከባህር ጠለል በላይ ስድስት መቶ አርባ አምስት ሜትር የደረሰ ሲሆን የግድቡ የሲቪል ሥራዎች ግንባታ 95 % ፣ የኤሌክትሮ ሜካኒካል ሥራዎች ፍብረካና ተከላ 61 % እንዲሁም የብረታ ብረት ሥራ 73 % ፣ አጠቃላይ አፈፃፀሙ ደግሞ 83 ነጥብ 3 % ደርሷል፡፡

የታላቁ የኢትዮጵያ ህዳሴ ግድብ ከፍታ ከመሬት 145 ሜትር ሲሆን ርዝመቱ ደግሞ 1 ነጥብ 8 ኪሎ ሜትር ይሆናል፡፡

የዋናው ግድብ ውፍረት የግድቡ ግርጌ ላይ 130 ሜትር፥ የግድቡ ጫፍ ወይም የላይኛው ክፍል ደግሞ 11 ሜትር ነው።

በበጀት ዓመቱ ታላቁ የኢትዮጵያ ህዳሴ ግድብ በ2 ዩኒት ኃይል ማመንጨት እንዲጀምር ለማድረግ የያዘው እቅድ ተሳክቷል።

ምንጭ፦ የኢትዮጵያ ኤሌክትሪክ ኃይል

@tikvahethiopia

#BREAKING

ሶስተኛው ዙር ሙሌት በስኬት ተጠናቀቀ።

የታላቁ ኢትዮጵያ ሕዳሴ ግድብ ሶስተኛው ዙር ሙሌት በስኬት ተጠናቆ ውሃ በግድቡ አናት ላይ መፍሰስ ጀምሯል።

ጠቅላይ ሚኒስትር ዶ/ር ዐቢይ አሕመድን ጨምሮ የተለያዩ የመንግስት የስራ ኃላፊዎች የግድቡን ሙሌት በስኬት መጠናቀቅ ለማብሰር በታላቁ የኢትዮጵያ ህዳሴ ግድብ መገኘታቸውን ብሄራዊ የቴሌቪዥን ጣቢያ ዘግቧል።

@tikvahethiopia

ለሱዳን እና ግብፅ !

ዛሬ በጉባ የታላቁ የኢትዮጵያ ህዳሴ ግድብ ሶስተኛ ዙር ውሃ ሙሌት በስኬት መጠናቀቁን ተከትሎ በተዘጋጀው መርሀ ግብር ላይ ጠ/ሚ ዶ/ር ዐቢይ አህመድ የተናገሩት ፦

" ... 85 ፐርሰንቱን የአባይ ውሃ Contribute ስናደርግ ቆይተን ላለፉት ዘመናት ሳንጠቀም መቆየታችን #የሚያስቆጭ ቢሆንም አሁን መልካም ጅምር በመታየቱ የሚገባንን ተጠቅመን ፤ የሚገባቸውን ለወንድሞቻችን ሰጥተን በጋራ ለማደግ በእኛ በኩል ዝግጁ መሆናችንን በድጋሚ እገልፃለሁ "

@tikvahethiopia

" የቦነስ እና የደሞዝ እርከን ጭማሪ ተፈቅዷል " - ንግድ ባንክ

የኢትዮጵያ ንግድ ባንክ ለሠራተኞቹ እና ከባንኩ ጋር ለሚሠሩ የኮሜርሻል ኖሚኒስ ሠራተኞች ቦነስ እና የደሞዝ እርከን ጭማሪ መፍቀዱን አስታወቀ።

ይህ የቦነስ እና የደሞዝ ጭማሪ የተፈቀደው ባንኩ በ2014 (2021/22) በጀት ዓመት አመርቂ ውጤት በማስመዝገቡ ምስጋና ለማቅረብ እና በአዲሱ በጀት ዓመት ከእስካሁኑ የላቀ ስኬትን ሰራተኞች እንዲያስመዘግቡ መሆኑን ገልጿል።

የኢትዮጵያ ንግድ ባንክ በበጀት ዓመቱ ከእቅድ አንጻር የ114.4 በመቶ አፈፃፀም በማስመዝገብ 27.5 ቢሊዮን ብር ትርፍ ማስመዝገቡን አስታውሷል።

@tikvahethiopia

" እድሜ ልክ እስራት ተፈርዶባቸዋል "

ወንጀል የሚፈፅሙበትን ቦታ ቀድመው አይተውና መርጠው ከጨረሱ በኋላ የራይድ ተጠቃሚ መስለው ደውለው በመጥራት የመኪናውን አሽከርካሪ በመግደል መኪናውንና ስልኩን ይዘው የተሰወሩት ግለሰቦች በእድሜ ልክ ፅኑ እስራት ተቀጡ።

ጉዳዩ እንዲህ ነው፦

1ኛ ተከሳሽ የአብስራ ሰለሞን እና 2ኛ ተከሳሽ በላይነው ንጉስ ካልተያዘው ግብረ-አበራቸው ጋር በመሆን ነሃሴ 6/2012 ዓ.ም ከምሽቱ 2፡30 ሰዓት ራይድ ደውለው አሽከርካሪውን በንፋስ ስልክ ክ/ከተማ ወረዳ 12 ክልል የሰዎች እንቅስቃሴ ወደማይበዛበት ገባ ያለ ቦታ ይጠራሉ።

ሆራ ትራዲንግ ተብሎ የሚጠራው ስፍራ ሲደርሱ 2ኛ ተከሳሽና ያለተያዘው ግብረ-አበራቸው አሽከርካሪ ንጉስ ከፍያለውን አንገቱን አንቀው በመያዝ ወንበር ስር ሲያስተኙት 1ኛ ተከሳሽም መኪውን እየነዳ ሟችን ወደኋላ በመዞር በተደጋጋሚ በጩቤ ሆዱ ላይ በርካታ ቦታ በመውጋት ህይወቱ እንዲያልፍ አድርገዋል።

በኃላም የሟችን ቪትዝ መኪና፣ የሞባይል ስልክና ያደረገውን ጫማ አጠቃላይ ድምሩ 758,250 ብር የሚያወጣ ንብረት ወስደው ይሰወራሉ።

ፖሊስ ባደረገው ክትትል በቁጥጥር ስር ውለው ምርመራ ሲደረግ ቆይቶ በፈፀሙት ከባድ ውንብድና ወንጀል በፍትሕ ሚኒስቴር ክስ ተመስርቶባቸዋል።

ተከሳሾች ክሱ ፍ/ቤት ቀርበው የእምነት ክህደት ቃላቸውን ሲጠየቁ ድርጊቱን አልፈፀምንም በማለት ክደው የተከራከሩ ሲሆን ዐቃቤ ህግ የሰውና የሰነድ ማስረጃዎች በማቅረብ አስረድቷል።

በፌዴራል ከፍተኛ ፍ/ቤት ልደታ ምድብ 1ኛ ግድያና ከባድ ውንብድና ችሎትም የዐቃቤ ህግና ተከሳሾችን ክርክር ሲከታተል ከቆየ በኋላ ተከሳሾች ጥፋተኛ ናቸው በማለት እያንዳንዳቸው በእድሜ ልክ ፅኑ እስራት እንዲቀጡ ወስኗል።

#ፍትህሚኒስቴር

@tikvahethiopia

ከስራ ቦታ እንደወጡ ያልተመለሱት አቶ ኢብራሂም በያን !

በኦሮሚያ ክልል ሰበታ ከተማ፣ ቀበሌ 04 ነዋሪ እና የሐጂ መሐመድ ሪል ስቴት ምክትል ሥራ አስኪያጅ የሆኑት ኢብራሂም በያን ሠይድ መጋቢት 29/2014 ከሥራ ቦታ እንደወጡ እስከአሁን አለመመለሳቸውን ፤ የት እንዳሉም እንደማይታወቅ ቤተሰቦቻቸው ገልጸዋል።

በወቅቱ አቶ ኢብራሂም ከሥራ ወጥተው ወደ መኖሪያ ቤታቸው በመመለስ ላይ እያሉ የስልክ ግንኙነት እንደነበራቸው የገለፁት ቤተሰቦቻቸው ከምሽቱ 3 ሰዓት አካባቢ ግን የስልክ ግንኙነቱ መቋረጡን፤ የስልክ ግንኙነቱ ሲቋረጥም በአዲስ አበባ ከተማ ልዩ ቦታው #ጀርመን_አደባባይ አካባቢ እንደነበሩን አታውሰዋል።

በአዲስ አበባ ከተማ በሚገኙ የተለያዩ የፖሊስ ጣቢያዎች ፣ ትራፊክ ጽ/ቤቶች፣ ሆስፒታሎችና ጤና ጣቢያዎች ጠይቀውም ምንም ፍንጭ ባለማግኘታቸው ለአዲስ አበባ ፖሊስ ኮሚሽን እንዳመለከቱ የገለጹት የአቶ ኢብራሂም ወንድም አብዱልሀዲ በያን እና የቅርብ ቤተሰባቸው ሩቅያ ሀሰን በወቅቱ ጉዳዩን መዝግቦ መርማሪ በመመደብ ተከታትሎ እንደሚያሳውቋቸው ፖሊስ እንደተነገራቸው ገልጸዋል።

ቢሆንም ግን ከመጋቢት 29 ቀን 2014 እስከ ዛሬ ምንም አይነት መፍትሄ እንዳልተገኘ አስረድተዋል።

አቶ ኢብራሂም ለረጅም ጊዜያት በመጥፋታቸውና ያሉበት ቦታ ባለመታወቁ ቤተሰቦቻቸው በጭንቀት ውስጥ የሚገኙ ሲሆን አሁንም ፍለጋቸውን መቀጠላቸውን ገልፀዋል።

የኢብራሂም ቤተሰቦች አቶ ኢብራሂምን ያየ ወይንም ያሉበትን ቦታ የሚያውቅ በስልክ 0911149306፣ 0911616199 ፣ 0911438549 ላይ በመደወል እንዲያሳውቃቸው ተማፅነዋል።

@tikvahethiopia

#ኢትዮጵያ🇪🇹

በካሊ በተደረገው የዓለም ከ20 ዓመት በታች የአትሌቲክስ ሻምፒዮና #ከዓለም 3ኛ ደረጃን ይዞ ያጠናቀቀው የኢትዮጵያ አትሌቲክስ ልዑካን ቡድን ዛሬ ምሽት በሰላም አዲስ አበባ ገብቷል።

ቡድኑ አዳሩን ስካይ ላይት ያደርጋል።

ነገ ከማለዳው አንድ ሰዓት ከ30 ጀምሮ ከስካይ ላይት ሆቴል በመነሳት በፓትሮልና በሲቲ ቱር ባሶች ታጅቦ በአዲስ አበባ ከተማ የተመረጡ ዋና ዋና መንገዶች በመዘዋወር ዜጎችን “ እንኳን ደስ አላችሁ ” እንደሚሉ የአትሌቲክስ ፌዴሬሽኑ ገልጿል።

በዕለቱም በስካይ ላይት የማበረታቻ ሽልማት እና የእውቅና መርሐ ግብር እንደሚካሄድ ተመላክቷል፡፡

በ19ኛው የዓለም ከ20 ዓመት በታች የአትሌቲክስ ሻምፒዮና ኢትዮጵያ በ6 ወርቅ፣5 የብር እና1 የነሐስ በድምሩ 12 ሜዳሊያዎችን በማግኘት አሜሪካና ጃማይካን ተከትላ ሶስተኛ መውጣቷ ይታወሳል።

Credit : ኤፍ ቢ ሲ

@tikvahethiopia

#Kenya🇰🇪

የኬንያ ምርጫ ውጤት ከምን ደረሰ ?

ጎረቤት ሀገር #ኬንያ ከቀናት በፊት ፕሬዜዳንታዊ ምርጫ እንዳደረገች ይታወቃል።

እስካሁን ድረስ የምርጫው አሸናፊ አልታወቀም። ቆጠራውም አልተጠናቀቀም።

የውጤት ቆጠራው ምርጫው ከተጠናቀቀበት ቀን አንስቶ እስከ ዛሬ እየተካሄድ ይገኛል።

እስካሁን ያለው ውጤት ከላይ ተያይዟል።

ከላይ በምስሉ ላይ የተያያዘው የምርጫ ውጤት የቢቢሲ አማርኛው አገልግሎት ክፍል ምርጫውን ከሚያስፈጽመው ኮሚሽን ይፋዊ ድረ ገጽ ላይ ዋቢ አደርጎ ያሰራጨው ነው።

@tikvahethiopia