#Amhara , #SouthGondar📍

የደቡብ ጎንደር ዞን አስተዳደር በዞኑ እስረኞችን ለማስፈታት የሞከሩ 16 ሰዎች መገደላቸውን አስታወቀ።

ዞኑ ይህን ያሳወቀው ለጀርመን ድምፅ ሬድዮ ጣቢያ በሰጠው ቃል ነው።

የዞን ም/አስተዳዳሪ አቶ ጥላሁን ደጀኔ ለሬድዮ ጣቢያው ፥ " ትናንት ሌሊት 8 ሰዓት ሲሆን ነፋስ መውጫ ማረሚያ ቤትና ሌሎች ሁለት ፖሊስ ጣቢያዎች እስረኛ ለማስፈታት ከሞከሩት ዘራፊ ካሏቸው ታጣቂዎች መካከል 16ቱ ሲገደሉ 20 ተማርከዋል " ሲሉ ተናግረዋል።

ከመንግስት በኩል ሶስት የፀጥታ አካላት መቁሰላቸውን ጠቁመዋል።

አቶ ጥላሁን ፤ " ዘራፊ " ያሏቸው አካላት ከተለያዩ አጎራባች ዞኖች የተሰባሰቡ ነበሩ ብለዋል።

ከማረሚያ ቤት ወጥተው ከነበሩት ታራሚዎች መካከል 65ቱ በሰሜን ወሎ ዞን መቄት ወረዳና በደቡብ ጎንደር ዞን ጋይንት ወረዳ በተውጣጡ ጥምር የፀጥታ አካላት ቅንጅት በያሉበት ተይዘው መመለሳቸውንም አቶ ጥላሁን አመልክተዋል።

ዛሬ የባህር ዳር - ወልዲያ መስመር ለተወሰነ ጊዜ ተቋርጦ እንደነበር እና ታጣቂዎቹ በሶስት ተለያዩ መኪናዎች የመጡ እንደነበሩ፤ ተሸከርካሪዎቹም በቁጥጥር ስር መዋላቸውን ነዋሪዎች እንደገለፁ የሬድዮ ጣቢያው ዘግቧል።

@tikvahethiopia

#ThomasSankara

የቀድሞ የቡርኪና ፋሶ ፕሬዝዳንት ብሌስ ኮምፓውሬ በቶማስ ሳንካራ ግድያ እጃቸው አለበት በሚል በ30 ዓመት እስር እንዲቀጡ የቡርኪና ፋሶ ወታደራዊ አቃቢ ህግ መጠየቁን አጃንስ ፍራንስ ፕሬስ ዘግቧል።

ቶማስ ሳንካራ ማነው ? በዚህ t.me/tikvahethiopia/67264 ያንብቡ።

@tikvahethiopia

#Oromia , #KelemWolega📍

በአንድ አይነት ጉዳይ የመንግስት ባለስልጣናት የሚናገሩት 🤔

በተለያዩ የወለጋ አካባቢዎች እጅግ በተደጋጋሚ በሚፈፀም ጥቃት በርካቶች እንደሚገደሉ፣ እንደሚጎዱ ፣ ከቤት ንብረታቸው እንደሚፈናቀሉ በተደጋጋሚ ሲገለፅ የነበረ ጉዳይ ነው።

ይህ የፀጥታ ችግር ሰሞነኛ ሳይሆን አመታትን የዘለቀ ዘላቂ መፍትሄም የሚሰጠው አካል ያላገኘ፣ የዜጎችን እምባ ማበስ ያልተቻለበት፣ አጥፊዎችን እንኳን ተለይተው ሊጠየቁ ያልተቻለበት ነው።

በተደጋጋሚ በወለጋ ጉዳይ መረጃ ተለዋውጠናል።

አካባቢው ተደራሽ ባለመሆኑ ፣ የትኛውም ሚዲያዎች ፣ የሰብዓዊ መብት ተቆርቋሪዎች በአካል ሊደርሱበት ስለማይችሉ መሬት ላይ እንኳ ምን እየሆነ እንዳለ በትክክል ማወቅ አዳጋች ነው።

የአካባቢው ችግር ሰሞነኛ መነጋገሪያ ሆኖ አጀንዳ ተደርጎ ይታለፋል፤ በዜጎች ስቃይ እና እምባ የዩትዩብ ገንዝብ ይሰራል ፤ በፀጥታ ችግር ግን የዜጎች ስቃይ ይቀጥላል።

የዜጎችን ደህንነት ለማስጠበቅ የተቀመጠው መንግስት በተደጋጋሚ ችግሩን እንደሚፈታ ሲናገር ቢቆይም አመታት አልፈዋል ችግሩ ቀጥሏል።

ከሰሞኑን ደግሞ ከቄለም ወለጋ ጋር በተያያዘ ማህበራዊ ሚዲያው አጀንዳ የሆነ ጉዳይ አለ። በጉዳዩ ዙሪያ ላይ ግን በመንግስት ባለስልጣናት የሚሰጡት አስተያየቶች የሚጣጣሙ ሆነው አልተገኙም።

እኛም ኢሰመኮን ያለውን የሰብዓዊ መብት ሁኔታ ያውቀው እንደሆነ ጠይቀናል።

የቄለም ወለጋ ዞን አስተዳደር ተወካይ እና የዞኑ አስተዳደር ጽህፈት ቤት ኃላፊ አቶ ኢብሣ በሻ ለኢፕድ ፦

" ... በጊዳሚ ወረዳ አሸባሪው ሸኔ ዘግናኝ ግድያዎችን እና የንብረት ውድመት ፈጽሟል።

በወረዳው በተለያዩ ቦታዎች 81 ሰዎችን እንዲሁም በጅምላ ተገድለው አስከሬናቸው አንድ ቦታ የተገኙ 87 ሰዎችን በድምሩ168 ንጹሐን ተገድለዋል። "

የቄለም ወለጋ ዞን የፀጥታ አስተዳደር ኃላፊ አቶ ተሰማ ዋሪዮ ለዶቼ ቨለ ፦

" ትላንትና ተለቆ ነበረ መረጃ ፤ እኛ በዞናችን ደረጃ ጅምላ ጭፍጨፋ ተካሂዷል የተባለው እኛ እንደምናውቀው 87 ሰው በሸኔ ታግቶ ጫካ እንዳለ ነው። ሁለት ወር በላይ ወረዳው በሸኔ ተይዞ ነበር ከታገቱት ውስጥ የኛ አመራር ፣ የወረዳው የካቢኔ አባላት እና የፀጥታ አካል ፣ ከህብረተሰቡን የቀበሌ አመራሮች ሸኔ አግቶ ወደ ጫካ ወስዷል።

ወደ ጫካ የወሰዳቸውን ሰዎች የጅምላ ጭፍጨፋ ተካሂዷል የሚል ወሬ ሰምቼ ነበር ፤ በእርግጥ ሰዎቹ መሞታቸው እና አለመሞታቸው ግና እያጣራን ፤ስለሆነ ትላንት የተላለፈው መረጃ ያልተጣራ ነው።

ገና የፀጥታ አካል በኮሚቴ ያ ኢንፎርሜሽን ልክ ነው ወይስ ልክ አይደለም ብሎ ቦታውን እንደርሳለን ብለን ኮሚቴ አዋቅረን ያ ኢንፎርሜሽን የተገኘ ሰውዬ ጋር እየተገናኘን ነው።

የታገቱት የኛ ካቢኔ፣ የፀጥታ አካላት ፣ ምሊሻ ፣ ልዩ ኃይል ፣ መደበኛ ፖሊስ ናቸው። እስካሁን አልተገኙም እያጣራን ስለሆነ ካጣራን በኃላ የት እንደሆነና ስንት ሰው እንደሆነ የሞተው መረጃ እንሰጣለን እንጂ ሰዎቹ ሞተዋል ጅምላ ጭፍጨፋ ተካሂዷል የሚባለው በተጨባጭ የተገኘ ሳይሆን በኢንፎርሜሽን ስለሆነ ኢንፎርሜሽኑን ደግሞ ገና እያጣራን ነው።

አስክሬን እስካሁን አልተገኘም። ገና ትክክል ነው አይደለም የሚለውን ኢንፎርሜሽኑን ከሰጠው ሰውዬ ጋር ሰውዬውን ወስደን ኮሚቴ አዋቅረን እዛው ቦታ ላይ ደርሰን እውነት መሆኑና አለመሆኑ ይረጋገጣል እንጂ አሁን በኢንፎርሜሽን ደረጃ የወረዳ ካቢኔ፣ የፀጥታ አካል የታገቱት ሞተዋል የሚለውን በወሬ ደረጃ ሰማን እንጂ ትክክለኛ መሆኑን መጨረሻ ላይ አልደረስንም።

የወረዳው አስተዳዳሪዎች፣ እና የፀጥታ ኃይሎች ታግተው መወሰዳቸውን ከታጋቾቹ ውስጥ አምልጦ ከወጣ ሰው አረጋግጠናል።

አጋቹ ያው ኦነግ ሸኔ ወረዳውን ይዞ ነበር አሁን ግን ነፃ ወጥቷል አሁን እኛ ነን እዚህ ያለነው። በእኛ እጅ ነው ወረዳው ያለው። የኛ መዋቅር ወደቦታው ተመልሶ ስራ ውስጥ ገብቷል። ግን ከአንድ ወር ሁለት ወር በላይ በእነሱ እጅ ነበር።

አንድ ሰው ሞቷል ሁለት ሰው ሞቷል ብለን ለመስራት ገና የሚጣራ ጉዳይ ነው። እስከሁን የሞተ ሰው ያየነው የለም።

ጫካ ለጫካ እያሰስን ነው ኦፕሬሽኑ እየተካሄደ ነው ለዚህ ኦፕሬሽን የመጣው ሰራዊት ሰዎቹ መሞታቸው እና መኖራቸውን እስኪያሳውቀን እየጠበቅን ነው፤ እየፈለግን ነው። "

ኢሰመኮ ለቲክቫህ ኢትዮጵያ ፦

" ባለው የፀጥታ ችግር አባላቶቻችንን እንኳን ለማሰማራት እና በአካባቢው ምን እየተካሄደ እንዳለ የተጣራ መረጃ ለማግኘት አስቸጋሪ ሁኔታዎች ነው ያሉት።

የመንግስት ሚዲያ ዘገባዎችን ትክክል ናቸው ስህተት ናቸው የሚለውን ለማረጋገጥ መሬት ላይ ስላለው ሁኔታ ተጨባጭ መረጃ ስለሌለን አሁን ምንም ልንላችሁ አንችልም።

ነገር ግን በአካባቢው ባለው ግጭት የተለያዩ ጉዳቶች እየደረሱ እንደሆነ እኛም እንደ ሌላው ዜጋ ከምንሰማቸው መረጃዎችን የምንረዳው ነገር አለ። specifically ግን እንዲህ ያለ ሰው ላይ እንዲህ ያለ ጉዳት ደርሷል የሚል ነገር ለማስተባበልም ሆነ ለማረጋገጥ የተጨበጠ ነገር የለንም።

ሁኔታዎች እስከፈቀዱ ድረስ ችግሮች ያሉባቸው እና የኛን Mandate የሚመለከት ጉዳዮችን መርምረን ያለውን እውነታ ለማሳወቅ ዝግጁ ነን። ግን መሬት ያለው ሁኔታ መፍቀድ አለበት። "

@tikvahethiopia

#BenishangulGumuz , #Kamashi📍

የካማሺ ዞን ታጣቂዎች ያናሷቸው ጥያቄዎች ምንድናቸው ?

የካማሺ ዞን ኮማንድ ፖስት ዋና አስተባባሪ ኮሎኔል ዓለሙ በሽር  ለሪፖርተር ጋዜጣ እንደተናገሩት ታጣቂዎቹ በእስር ላይ ያሉ አባሎቻቸው እንዲፈቱ ጠይቀዋል።

የዞኑ አስተዳደሮች ይሄ ጥያቄ በዞኑ የሚመለስ እንዳልሆነ አስረድተው፣ በጉዳዩ ላይ ከበላይ አካላት ጋር ንግግር በማድረግ መልስ እንደሚሰጡ አሳውቀዋል።

ሌላው በመተከል ዞን የሚገኙና ከክልሉ ውጪ ያሉ የፀጥታ ኃይሎች እንዲወጡ ታጣቂዎቹ ጠይቀዋል።

ኮሎኔል ዓለሙ በሽር ፥ " የሌሎቹን አላውቅም፤ የፌዴራል ፖሊስ እና መከላከያ ሠራዊትን ግን ማስወጣት አይችሉም፣ ይኼ አይመለስላቸውም እርግጠኛ ነኝ " ብለዋል።

በተጨማሪም ታጣቂዎቹ " በክልሉ ውስጥ ድርሻ ይኑረን " የሚል ጥያቄም አንስተዋል።

የካማሺ ዞን ዋና አስተዳዳሪ አቶ ብጅጋ ጻፊዮ ፤ ታጣቂዎቹ ያቀረቧቸውን ጥያቄዎች በተመለከተ በካማሺ ዞን ደረጃ ሚስተናገዱትን እንደሚመለሱ በክልል ወይም በፌዴራል ደረጃ የሚመለሰውን ደግሞ የዞኑ አስተዳደር ለበላይ አካላት እንደሚያስታውቅ ስምምነት ላይ መደረሱን ለጋዜጣው አሳውቀዋል።

@tikvahethiopia

የብሄራዊ ፈተና ጉዳይ ?

በትምህርት ሚኒስቴር የዕቅድ እና ሀብት ማፈላለግ ዋና ዳይሬክተር አቶ ኤልያስ ግርማ ፦

" የአገር አቀፍ ፈተናው በቴክኖሎጂ ተደግፎ በኦንላይን ሥርዓት ታግዞ ካልተሰጠ የምዘናው ሥርዓት አደጋ ውስጥ ነው "

የአገር አቀፍ የትምህርት ምዘናና ፈተናዎች ኤጀንሲ ምክትል ዋና ዳይሬክተር አቶ ተፈራ ፈይሳ ፦

" የ12ኛ ክፍል ብሔራዊ ፈተና ምዘና ጉዳይ የሚመለከታቸው ተቋማትን ብቻ ሳይሆን መንግሥትንም የፈተነ ነው።

የፀጥታ ችግር ፈተናውን ለመስጠት አዳጋች ካደረጉት ጉዳዮች ተጠቃሹ ሲሆን፣ ከሰሞኑ በሁለተኛ ዙር በተሰጠው የ2013 ዓ.ም. አገር አቀፍ የ12ኛ ክፍል መልቀቂያ ብሔራዊ ፈተና እንኳን 150 የሚደርሱ ተማሪዎችን ከአንድ ቦታ ወደ ሌላ ቦታ ወስዶ ለመፈተን ከ100 በላይ የፀጥታ ኃይል ባልደረባ እጀባ አስፈልጎ ነበር።

በዚህ የተነሳ አገር አቀፍ ሁለተኛ ደረጃ ፈተናን የመስጠት ሥራ ከኤጀንሲው አቅም በላይ ለመንግሥትም ፈተና ሆኗል።

አገራዊ ፈተናው የሚሰጥበት ዋና ዓላማ፣ የትምህርት ጥራት ማረጋገጫ አንዱ መሣሪያና የብቁ ዜጋ ማፍሪያ መለኪያነቱን ታሳቢ በማድረግ ቢሆንም፣ በዚህ ወቅት ከዚህ ዓላማ ውጪ መስመሩን ስቶ ራሱን የቻለ ትልቅ ፈተና ሆኗል።

በሌላ በኩል ፈተናው ፖለቲካዊ ይዘትን እየተላበሰ መጥቷል። አገርን በሚገነባ ዕሳቤ ሳይሆን፣ " ከእኔ ክልል ይህን ያህል አለፈ " ወደሚል ጤናማ ያልሆነ ውድድር ውስጥ እንደተገባ ነው።

ከኤጀንሲው አቅም በላይ የሆነውን ይህንን ችግር መንግሥት ትኩረት ሊሰጠው ይገባል። በተለይ ከላይ የተነሱትን ችግሮች ለመፍታት ብቸኛው መንገድ፣ ፈተናውን በዲጂታል መንገድ በኦንላይን መስጠት ነው "

[ ለሕዝብ ተወካዮች ምክር ቤት የሰው ሀብት ልማት፣ ሥራ ሥምሪትና ቴክኖሎጂ ጉዳዮች ቋሚ ኮሚቴ የተናግሩት - ሪፖርተር ]

@tikvahethiopia

#AnbesaCityBus

አንበሳ የከተማ አውቶብስ እስከ ለሊቱ 6 ሰዓት አገልግሎት ለመስጠት እየተዘጋጀ እንደሚገኝ አስታወቀ።

ድርጅቱ እስከ የለሊት አገልግሎትን ለመስጠት ተገልጋዮች የሚበዙባቸውን የአዲስ አበባ አካባቢዎች የመለየት ስራ እያከናወነ ሲሆን ጥናቱ ሲጠባቀቅ እስከ ምሽት 3 ሰዓት አገልግሎት የሚሰጡት አውቶብሶች እስከ ለሊት 6 ሰዓት ወደ ስራ እንደሚያስገባ ገልጿል።

የድርጅቱ የህዝብ ግንኙነት ኃላፊ አቶ ምስክር ማንደፍሮ፥ " አሁን እስከ 3 ሰዓት ብቻ ነው አገልግሎት የሚሰጡት ከዚህ በኃላ በምንጀምረው አዲስ አገልግሎት እስከ ለሊት አጋማሽ ድረስ አገልግሎት እንዲሰጡ የትኞቹ መስመሮች ለእንደዚህ አይነት ስራ ተጋላጭ ናቸው / የትኞቹ መስመሮች አምሽተው የሚሰሩ በዛ በምናስበው ሰዓት ከስራቸው የሚወጡ ማህበረሰቦች አሉ የሚለውን ጥናት እያደረግን ነው፤ ጥናቱን ከጨረስን በኃላ የተወሰኑ እንደ ዲሞንስትሬሽን የምንጀምረው አሰራር ይኖራል " ብለዋል።

አንበሳ የከተማ አውቶብስ አገልግሎት የቀኑን የትራንስፖርት እጥረት ለመፍታት የአዲስ አበባ አስተዳደር ይገዛቸዋል የተባሉትን 3 ሺህ አውቶብሶች እየጠበቀ እንደሚገኝ እና አውቶብሶቹን እንደተረከበ በመጠሉ ችግሩን ለማቃለል እንሞክራለን ሲል አሳውቋል።

አሁን ላይ አምበሳ የከተማ አውቶብስ አገልግሎት ድርጅት 630 አውቶብሶች ያሉት ሲሆን በ125 መስመሮች በቀን ውስጥ እስከ 600 ሺ ያህል ሰዎችን እንደሚያጓጉዝ ገልጿል።

ምንጭ፦ ሸገር ኤፍ ኤም 102.1

@tikvahethiopia