#ተራዝሟል

የአዲስ አበባ ቤቶች ልማት እና አስተዳደር ቢሮ የ2005 ዓ.ም የ20/80 እና 40/60 የቤት ልማት ተመዝጋቢ ሆነው በማኅበር ተደራጅተው ቤት ለመስራት ቀደም ሲል በኦንላይን የተመዘገቡ አመልካቾች በየሚኖሩበት ወረዳ ቀርበው መረጃቸውን ከየካቲት 16 እስከ መጋቢት 16/2014 ዓ.ም ድረስ በአካል እንዲያረጋግጡ መገለጹ ይታወሳል።

ቢሮው በዛሬ ዕለት ባወጣው ማስታወቂያ አመልካቾች ምዝገባቸውን የሚያረጋግጡበትን ጊዜ እስከ ሚያዝያ 17 ቀን 2014 ዓ.ም መራዘሙን አስታውቋል።

በዚህም በአዲስ አበባ ከተማ ክልል በራሳችሁም ሆነ በትዳር አጋራችሁ ስም ቤት ወይም የቤት መስሪያ ቦታ የሌላችሁ ወይም ኖሯችሁ ከ1997 ዓ.ም ወዲህ በስጦታ / በሽያጭ ያላስተላለፋችሁ መሆኑን እና ሌሎች መረጃዎችን በቅጽ 01 በማዘጋጀት ምዝገባችሁን እንድታሟሉ ጠይቋል።

ዲያስፖራ ሆነው በኦንላይን የተመዘገቡ የማኅበር ቤት ፈላጊዎች ደግሞ ከመጋቢት 19 ቀን 2014 እስከ ሚያዝያ 17 ቀን 2014 ዓ.ም ባለው ጊዜ ባምቢስ አካባቢ ግሪክ ት/ቤት ፊት ለፊት በሚገኘው የቤቶች ልማትና አስተዳደር ቢሮ 8ኛ ፎቅ ተመዝጋቢዎች ወይም በህጋዊ ወኪሎቻችሁ አማካኝነት በአካል ቀርባችሁ የተዘጋጀውን ቅፅ 001 እንዲሞሉ አስታውቋል።

ከላይ በተጠቀሰው ጊዜ ቀርባችሁ " ቅፅ -01 " እና " ቅፅ- 001 " ን ያልሞላችሁ ተመዝጋቢዎች በፈቃዳችሁ የተዋችሁት ተደርጎ እንደሚወሰድ የከተማው ቤቶች ልማት እና አስተዳደር ቢሮ ገልጿል።

@tikvahethiopia

#UK

ከዚህ ቀደም ኢትዮጵያ መጥተው ስለሰሜን ኢትዮጵያው ግጭት እና ስለወቅታዊ የኢትዮጵያ ሁኔታ ላይ ከከፍተኛ የሀገሪቱ ባለሰልጣናት ጋር ውይይት አድርገው የነበሩት የዩናይትድ ኪንግደም የአፍሪካ ጉዳዮች ሚኒስትር ቪኪ ፎርድ ፤ መንግስት ለሰብዓዊነት ሲባል ግጭት ለማቆም እና ያልተገደበ የሰብዓዊ ድጋፍ ወደ ትግራይ እንዲደርስ ለማድረግ ያሳየውን ቁርጠኝነት አጥብቀው እንደሚደግፉ አሳውቀዋል።

ቪኪ ፎርድ ፥ የትግራይ ባለስልጣናት ተኩስ በማቆም እና ከአፋር በመውጣት ምላሽ መስጠት አለባቸው ብለዋል።

የታየው ቁርጠኝነት በተግባር ሰብዓዊ እርዳታ ወደመላክ መተርጎም አለበት ያሉት ሚኒስትሯ ይህንንም የዩናይትድ ኪንግደም መንግሥት ለመደገፍ ዝግጁ ነው ሲሉ አብስረዋል።

ህወሓት ባወጣው መግለጫ የሰብዓዊ እርዳታ ትግራይ የሚደርስ ከሆነ ግጭት ለማቆም ዝግጁ መሆኑን የገለፀ ሲሆን ከያዛቸው የአጎራባች ክልል አካባቢዎች ለቆ ስለመውጣት ያለው ነገር የለም።

@tikvahethiopia

#Update

የኢትዮጵያ አየር መንገድ ግሩፕ ቀዳማዊ መሰረታዊ የሰራተኛ ማህበር ስራ አስፈፃሚ ኮሚቴ በቅርቡ ከተሾሙት የአየር መንገዱ የቦርድ ሰብሳቢ የተከበሩ አቶ ግርማ ዋቄ ጋር በተለያዩ ጉዳዮች ላይ ሰፊ ውይይት አድርጓል።

በውይይቱ ላይ የማህበሩ ፕሬዝዳንት ኢ/ር ተሊላ ዴሬሳ አዲስ ለተሾሙት የቦርድ ሰብሳቢ እንኳን ወደ ቤቶ በደህና ተመልሰው መጡ የሚል የእንኳን ደህና መጣችሁ መልዕክትን አስተላለፈው የሰራተኛ ማህበሩ እንደከዚህ ቀደሙ ሰራተኞችን አስተባብሮ ለድርጅቱና ለሰራተኛው ጥቅም በርትቶ እንደሚሰራ አስታውቀዋል።

የድርጅቱ የቦርድ ሰብሳቢ አቶ ግርማ ዋቄም በአዲስ መንፈስ ለተሻለ ለውጥና ዕድገት ሁሉንም ባለድርሻ አካላት አስተባብረው ለመስራት ቁርጠኝነት እንዳላቸው አስታውቀው የሰራተኛ ማህበሩ ሚና ትልቅ በመሆኑ ለተሻለ ለውጥና እድገት በጋራ ለመስራት እንዲዘጋጁ ጥሪ አቅርበዋል።

Via Abdi Kuma

@tikvahethiopia

#AU #IGAD

የአፍሪካ ህብረት ኮሚሽን ሊቀመንበር የሆኑት ሙሳፋቂ መሃመት የኢትዮጵያ መንግስት ለሰብዓዊነት ሲባል ግጭት ለማቆም መወሰኑን እንደሚያደንቁ ገልፀዋል።

የኢትዮጵያ መንግስት የበትግራይ ክልል ሰብዓዊ እርዳታ ለሚያስፈልጋቸው ዜጎች የሰብዓዊ ድጋፍ አቅርቦትን ለማድረስ የወሰነው ውሳኔ ይደነቃል ብለዋል።

በተጨማሪ ፤ የትግራይ ክልላዊ መንግስት ለሰብዓዊነት ተብሎ ግጭት ለማቆም የተላለፈውን ውሳኔ ለመመልከት እና በአስቸኳይ ግጭት ለማቆም ማወጁን እንደሚያደንቁ ገልፀዋል።

ለጋሾች እና የሰብዓዊ እርዳታ ድርጅቶች በትግራይ ፣ አማራ እና አፋር ክልሎች በአስቸጋሪ ሁኔታ ውስጥ ለሚገኙ ዜጎች የሚያደርጉትን ድጋፍ በእጥፍ እንዲያሳድጉም ጥሪ አቅርበዋል።

ሊቀመንበሩ ፤ ሁሉን አቀፍና በድርድር በሚመጣ የተኩስ አቁም ላይ ሁሉም ወገን እንዲደርስ ህብረቱ ጥረቱን እንደሚቀጥል አሳውቀዋል።

በህብረቱ የአፍሪካ ቀንድ ልዩ መልዕክተኛ የቀድሞው የናይጄሪያ ፕሬዜዳንት ኦሊሴጉን ኦባሳንጆ ከሁሉም ወገን እና ባለድርሻ አካላት ጋር በመስራት ግጭቱን በፍጥነት ለመቋጨት የጀመሩትን ጥረት አጠናክረው እንደሚቀጥሉ ሊቀመንበሩ አሳውቀዋል።

በሌላ በኩል የኢጋድ ዋና ፀሀፊ ዶ/ር ወርቅነህ ገበየሁ የኢትዮጵያ መንግስት ለሰብዓዊነት ሲባል ግጭት ማቆሙን አድንቀዋል ፤ የትግራይ ክልል መንግስትም ውሳኔው ንለማክበር እና ግጭት ለማቆም በመወሰን ምላሽ በመስጠቱ አድንቀዋል።

ለትግራይ ክልል እና ሌሎች በድርቅና በምግብ እጦት ለተጎዱ ክልሎች ሰብዓዊ እርዳታ በተጠናከረ መልኩ እንዲደረግ ዓለም አቀፍ አጋሮች የቻሉትን ሁሉ ጥረት እንዲያደርጉ ጥሪ አቅርበዋል።

ሁሉም ወገኖች ብሄራዊ ውይይት ጨምሮ ለዘላቂ ሰላም መስፈን ሁሉንም የሰላም አማራጮችን እንዲጠቀሙ ጠይቀዋል።

@tikvahethiopia

#Ukraine #Russia

ሩሲያ የዩክሬንን የአየር ክልል ለመዝጋት ከሚሞክር ኃይል ጋር ጦርነት እንደምትከፍት ገለፀች።

ሀገሪቱ ይህን የገለፀችው በዩክሬን እያካሄድኩ ነው ያለችውን “ልዩ ወታደራዊ ዘመቻ” የመጀመሪያውን ምዕራፍ ማጠናቀቋን ባሳወቀችበት ወቅት ነው።

ሀገሪቱ ተጠናቋል ባለችው የመጀመሪያ ምዕራፍ ያስቀመጠችው ግቦች እንደተሳኩ የገለጸች ሲሆን ብዙ የዩክሬን ግዛቶችን መቆጣጠሯን አሳውቃለች።

ሩስያ ጦሯ የዩክሬንን ዋና ከተማ ኪቭን ጨምሮ ካርኪቭ፣ ቼርኒሂቭመ ሱሚ እና ሚኮላይቭ የተባሉ አካባቢዎችን መክበቡን ገልፃለች። በተጨማሪ ኬርሶን እና ዛፖሮዚ የተባሉ የዩክሬን ግዛቶች አሁን ላይ በእጇ ላይ መውደቁን አሳውቃለች።

በዩክሬን የተገንጣዮች ግዛት የሆነችውን ሉሃንስክን ደግሞ 93 በመቶ መቆጣጠሯን አሳውቃለች።

የዩክሬንን የአየር ክልል ለመዝጋት ከሚሞክር ኃይል ጋር ጦርነት እንደምትከፍትም ዝታለች።

4 ሳምንታት ባስቆጠረው የሩሲያ እና ዩክሬን ጦርነት ምክንያት ቁጥራቸው በውል የማይታወቁ ሰዎች ሲያልቁ ከ3 ሚሊዮን በላይ ዜጎች ሀገራቸውን ለቀው ተሰደዋል።

መረጃው የአልዓይን ኒውስ ነው።

@tikvahethiopia

#SuperSport

ዓለም አቀፍ የሆኑ የስፖርት ውድድሮች በሱፐር ስፖርት በአማርኛ ቋንቋ መቅረብ ጀመሩ።

በመልቲቾይስ አፍሪካ እህት ኩባንያ " ሱፐርስፖርት " አማካኝነት በDSTV ቻናል 240 አዲሱ ቻናል ሀገራዊ እና ዓለም አቀፍ የስፖርት ክንውኖችን በአማርኛ ቋንቋ ከመጋቢት 9 ጀምሮ ማስተላለፍ መጀመሩን ዛሬ ባዘጋጀው ይፋዊ የማሳወቂያ መርሐግብር ላይ ተገልጿል።

በመድረኩ ላይ እንደተገለጸው የቤት ኪንግ ኢትዮጵያ ፕሪሚየር ሊግ በዋናነት በዚህ የሱፐር ስፖርት ልዩ ቻናል 240 ይተላለፋል ነው የተባለው።

ሱፐርስፖርት ልዩ በአማርኛ ቋንቋ የኢንግሊዝ ፕሪሚየር ሊግ፣ ቻምፒየንስ ሊግ፣ ኤፍ ኤካፕና ሌሎች የስፖርት ውድድሮችን የሚያቀርብ ሲሆን የአትሌቲክስ፣ UFC & Boxing፣ WWE እንዲሁም የቴኒስ፣ ጎልፍ፣ የሞተር ውድድር፣ ራግቢና ክሪኬት በአማርኛ ቋንቋ ይተላለፋሉ ተብሏል።

በዕለቱም የ " አቦል ቴሌቪዥን " አንደኛ ዓመት የተከበረ ሲሆን የቴሌቪዥን ቻናሉ በተለይ በፊልም ኢንዱስትሪው ላይ ያሳደረው ጉልህ ድርሻ ተነስቷል።

በመድረኩ የአማርኛ ይዘቶች ከሚቀጥለው ዓመት ጀምሮ የግርጌ የትርጉም ጹሑፍ (Subtitles) ታክሎባቸው ለዕይታ ይበቃሉ ተብሏል።

@tikvahethiopia