#Tigray #Amhara #Afar #Oromia

የኢትዮጵያ ካቶሊካዊት ቤተክርስቲያን በትግራይ ፣ በአማራ ፣ በአፋር እና በኦሮሚያ ክልሎች በጸጥታ ችግር እና በጦርነት ምክንያት ጉዳት ለደረሰባቸው ሰዎች የሚቀርብ ሰብአዊ ድጋፍ እና የመልሶ ማቋቋም የሚውል 134,884,285 ብር መርሃግብር አስጀምራለች።

ይኸው መርሃግብር ለ227,255 ዜጎች ምግብ እና ምግብ ነክ ያልሆኑ ድጋፎችን በአፋጣኝ ለማድረስ የሚውል ሲሆን ከእነዚህም መካከል 9,690 ህፃናት 36,199 ተፈናቃዮች እና ተቀባይ ማህበረሰብ ይገኙበታል።

ፕሮጀክቱ የሚከናወነው በቤተክርስቲያኗ የልማት ኮሚሽን 4 ሀገረስብከቶች አማካኝነት በተጠቀሱት 4 ክልሎች ውስጥ በሚገኙ 7 ዞኖች እና 11 ወረዳዎች ነው።

ገንዘቡን ለማሰባሰብ ድጋፍ ያደረጉት የካሪታስ ዓለም አቀፍ አባል ድርጅቶች እና ሌሎች የቤተክርስቲያን አጋር ድርጅቶች መሆናቸው ተገልፆልናል።

@tikvahethiopia

#USA

የአሜሪካ ም/ቤት አባሉ ከአንድ አፍሪካዊ ባለሀብት ገንዘብ መቀበላቸው ተረጋገጠ።

ከአንድ አፍሪካዊ ቢሊየነር የገንዘብ ድጋፍ ስለማግኘታቸው ዋሽተዋል የተባሉ የአሜሪካ ም/ቤት አባል ከእንደራሴነታቸው ሊባረሩ እንደሚችሉ ተነገረ።

ጄፍ ፎርተንቤሪ የተባሉት የኔብራስከካ ግዛት የሪፐብሊካን ፓርቲ ተወካይ፣ ከስኬታማው ናይጄሪያዊ የንግድ ሰው ጊልበርት ቻጉሪ ሕገወጥ የገንዘብ ድጋፍ ስለመቀበላቸው ለFBI መዋሸታቸውን የፌደራል ዳኞች እንደደረሱበት ቢቢሲ ፅፏል።

ከዚህ ጋር ተያይዞ በ3 ጥፋቶች አስከ 15 ዓመት የሚደርስ የእስር ቅጣት ለፈረድባቸው ይችላል ተብሏል።

ይህ ጉዳይ የውጭ ተጽእኖ ፈጣሪዎች በአሜሪካ ፖለቲካ ውስጥ ሊያሳድሩ የሚችሉትን ጫና በተመለከተ ከዚህ በፊት የነበረውን ክርክር መልሶ ቀስቅሶታል።

ምንም እንኳን የውጭ ዜጎች ለፖለቲካ ጉዳዮች የገንዘብ ድጋፍ ማድረግ ባይፈቀድላቸውም የ75 ዓመቱ ናይጄሪያዊ ቢሊየነር በርካታ የገንዘብ ስጦታዎችን ማበርከታቸው ይነገራል።

ግለሰቡ እኤአ በ2016 ላይ አሁን ጥፋተኛ ሆነው ለተገኙት የምክር ቤት አባል ጄፍ ፎርተንቤሪ በበሌሎች ለጋሾች በኩል በሕገወጥ መንገድ የ30,000 ዶላር የገንዘብ ድጋፍ ሰጥተዋል ተብሏል።

እንደራሴው 30,000 ዶላር የገንዘብ ድጋፍ እንደሚያገኙ የሚገልጽ የተቀረጸ የስልክ ውይይት የተገኘ ቢሆንም፣ ለFBI መርማሪዎች ግን ስለገንዘቡ ምንም የሚያውቁት ነገር እንደሌለ ክደዋል።

ሐሙስ በሎስ አንጀለስ ጉዳዩን የተመለከቱት ዳኞች ፣ ጄፍ ፎርተንቤሪን ሐሰተኛ ቃል በመስጠትና እውነትን ከፌደራል መርማሪዎች በመደበቅ ጥፋተኛ ብለዋቸዋል።

የምክር ቤት አባሉ ላይ የቅጣት ውሳኔ የሚሰጠው ከወራት በኋላ ሰኔ ላይ ሲሆን፣ አስከዚው ድረስ ግን እንደራሴው በውሳኔው ላይ ይግባኝ እንደሚጠይቁ መናገራቸውን ቢቢሲ ዘግቧል።

@tikvahethiopia

#Update

የኦሮሞ ፌዴራሊስት ኮንግረስ ከመጋቢት 17 እስከ መጋቢት 18 የሚያካሂደውን 2ኛ መደበኛ ጉባኤው ዛሬ በአዲስ አበባ ማካሄድ ጀምራል።

በዛሬው ዕለት በነበረው የጉባኤው ማስጀመሪያ ስነስርዓት ላይ የፓርቲው ሊቀመንበር የሆኑት ፕ/ር መረራ ጉዲና ንግግር አድርገዋል።

ፕ/ር መረራ በንግግራቸው " በሀገሪቱ ለውጥ እንዲመጣ የኦሮሞ ወጣት (ቄሮና ቀሬዎች ) የደም ዋጋ ከፍሎበታል። ብዙዎችን አጥተንበታል " ብለዋል።

" ለውጡ መጥቶ አዲስ መንግስት ተመስርቶ ወንድሞቻችን ወደ ሚኒሊክ ቤተመንግስት ሲገቡ ትንሽ ስራቸው አሳስቦኝ በግፋ በለው ባይሄዱ አልኩኝ " ያሉት ፕ/ር መረራ " በዚያ በግፋ በለው መንገድ በመሄዳቸው በእነዚህ አራት ዓመታት ሀገራችንንም ሆነ ህዝባችንን ብሎም ፓርቲያችንን ከፍተኛ ዋጋ አስከፍለዋል " ሲሉ ተደምጠዋል።

" ከምንም በላይ ደግሞ ምርጫውን ያለ ብሄራዊ መግባባት ብናደርግ ሰላም እና መረጋጋትን እድገት እና ብልፅግናን ብሎም ዴሞክራሲን አያመጣም በፈጣሪ ስም ወደ ብሄራዊ መግባባት እንሂድ ብለን ጠይቀን ነበር " ብለዋል።

" ነገር ግን በእንቢተኝነት ተሄደበት ውጤቱ ደግሞ የምታዩት ነው ፤ ኃይል በእጃቸው ያለው አይሆንም እኛ በቀድሞ ህግ መሰረት ነው የምንሄደው ብለው ምርጫ አካሄዱ ያ ደግሞ ጦርነት መዘዘ " ሲሉ ተናግረዋል።

ፕ/ር መረራ " ጦርነቱ እንዳይጀመር ተማፅነናል " ያሉ ሲሆን " ከተጀመረም እንዳይቀጥል በተደጋጋሚ ነው የጠየቅነው አሁን ያ ሁሉ ህይወትና ንብረት ወድሞ ወደእርቅ ተመጥቷል " ብለዋል።

ፕሮፌሰሩ ፤ 2014 ዓ/ም ላይ ከተካሄደው ምርጫ ተገፍተው መውጣታቸውን ገልፀው የፓርቲያቸው ጥያቄ የነበረው እውነተኛ የምርጫ ቦርድ ፣ ምህዳሩ የሰፋ የፖለቲካ ስርዓት እንደነበር አስረድተዋል።

የሃጫሉን ህልፈት ተከትሎ የፓርቲው አባላት እና አመራሮች ወደ እስር ቤት መታጎራቸውን ፤ ከ206 ፅህፈት ቤቶችም 203ቱን መዘጋታቸውን ይህን ተከትሎ ተገፍተው ከምርጫ መውጣታቸውን ገልፀዋል።

ፕሮፌሰር መረራ ጉዲና፤ በትግራይ ምርጫ እንዳልተካሄደና በኦሮሚያም አንድ ፓርቲ ከራሱ ጋር መወዳደሩን አንስተዋል።

በመጨረሻ ፕሮፌሰር መረራ " ሰሞኑን መንግስት ከህወሓት ጋር ጦርነቱን አቁሞ ወደ ብሄራዊ መግባባት እንሂድ እየተባለ ነው የሚገኘው የኛዎቹስ ? ኦነግ ሸኔ የተባሉትን በአንድ ወር እናጠፋለን እያሉ ነው በጦርነቱ ማንም ያሸንፍ ማን የኦሮሞ ህዝብ ግን የከፋ ዋጋን ያስከፍለዋል በፈጣሪ ስም አስቡበት በሏቸው። " ሲሉ ተደምጠዋል።

ፓርቲያቸው ለሰላም በሚደረገው ትግል፣ ለሀቀኛ ዴሞክራሲ በሚደረገው ትግል፣ ይሄን ሀገር ለመለወጥ እና ብልፅግናን ለማረጋገጥ በሚደረገው ትግል ውስጥ የራሱን አስተዋፅኦ እንደሚያደርግ አረጋግጠዋል።

@tikvahethiopia