በኮሪደር ልማት ስራ የተገኙ እምርታዎችን ቀምረን በሁሉም አካባቢዎች ተደራሽ እንዲሆኑ እንቀሳቀሳለን - አቶ አደም ፋራህ

አዲስ አበባ፣ ነሐሴ 10፣ 2016 (ኤፍ ቢ ሲ) የአዲስ አበባ ውብ መንደሮች ኢትዮጵያ እንድትመስል የምንፈልገውን ብልፅግናዊ ምስል እየገለጡ ነው ሲሉ በምክትል ጠቅላይ ሚኒስትር ማዕረግ የዴሞክራሲ ሥርዓት ግንባታ ማስተባበሪያ ማዕከል ኃላፊና የብልጽግና ፓርቲ ምክትል ፕሬዚዳንት አደም ፋራህ ገለጹ፡፡

አቶ አደም ፋራህ በማህበራዊ ትስስር ገጻቸው ባስተላለፉት መልዕክት፤ የፓርቲያችን የከተማ ልማት እሳቤ በጠንካራ የስራ ባህል ተሟሽቶ፣ በህዝባችን ልማት ወዳድነት ከፍተኛ አቅም አግኝቶ፣ በሀገር በቀል የግንባታ ጠበብቶቻችን ድምር ውጤት ፍሬ አፍርቶ አዲስ አበባ ላይ ውጤቱን ፍንትው ብሎ አይተነዋል ብለዋል።

በኮሪደር ልማት አቧራን አራግፈን የገለጥነው ውበት፣ ከሰራን ሁሉም ሊለወጥ እንደሚችል ያረጋገጥነው እውነት፣ ዘወትር በትውልድ ልብ ውስጥ ተስፋ እና የይቻላል መንፈስን እንደሚጭር በፅኑ እናምናለንም ሲሉም ገልጸዋል።

የተገኘውን ውጤትም በአግባቡ በማጤን እና በቀጣይ በኮሪደር ልማት ስራ የተገኙ እምርታዎችን ቀምረን በሁሉም የሀገራችን ክፍሎች ተደራሽ እንዲሆኑ ለማድረግ ልዩ ትኩረት ሰጥተን የምንንቀሳቀስ ይሆናል ሲሉም አክለዋል።

ዩኒቨርሲቲው በተለያዩ መስኮች ያሰለጠናቸውን ተማሪዎች አስመረቀ

አዲስ አበባ፣ ነሐሴ 11፣ 2016 (ኤፍ ቢ ሲ) የኢትዮጵያ መከላከያ ዩኒቨርሲቲ በተለያዩ መስኮች ያሰለጠናቸውን ተማሪዎች አስመርቋል፡፡

ተመራቂዎቹ በምህንድስና፣ በጤና እና በሃብት አሥተዳደር ዘርፍ ትምህርታቸውን በመጀመሪያና ሁለተኛ ዲግሪ እንዲሁም በምህንድስና የትምህርት ዘርፍ በዶክትሬት ዲግሪ መከታተላቸው ተገልጿል፡፡

በምረቃ ሥነ-ሥርዓቱ ላይ የፕላንና ልማት ሚኒስትርና የዩኒቨርሲቲው የቦርድ ሰብሳቢ ፍጹም አሰፋን (ዶ/ር) ጨምሮ የመከላከያ ሚኒስትር ዴዔታዎች፣ የመከላከያ ከፍተኛ መኮንኖችና የተለያዩ ሀገራት ወታደራዊ አታሼዎች ተገኝተዋል።

በሦስት ኮሌጆች እና በአንድ የምርምር እና ልማት ኢንስቲትዩት የተዋቀረው ዩኒቨርሲወቲው÷ በመጪዎቹ ዓመታት በአፍሪካ ከሚገኙ ምርጥ የመከላከያ ዩኒቨርሲቲዎች ቀዳሚ የመሆን ራዕይ አንግቦ እየሠራ መሆኑ ተመላክቷል፡፡

ከኢትዮጵያ ተማሪዎች በተጨማሪ ከጎረቤት ሀገራት የመጡ ተማሪዎችንም አሰልጥኖ እያስመረቀ መሆኑን ኢዜአ ዘግቧል፡፡