የትግራይ ሕዝብ ከመቼውም ጊዜ በላይ ሰላሙን እንዲጠብቅ ጥሪ ቀረበ

አዲስ አበባ፣ መስከረም 19፣ 2017 (ኤፍ ቢ ሲ) የተጀመሩ የልማት ሥራዎች ከፍጻሜ እንዲደርሱ ሕዝቡ ከመቼውም ጊዜ በላይ ሰላሙን እንዲጠብቅ የትግራይ ክልል ጊዜያዊ አስተዳደር ርዕሰ መሥተዳድር ጌታቸው ረዳ ጥሪ አቀረቡ፡፡

ርዕሰ መሥተዳድሩ በትግራይ ደቡብ ምሥራቅ ዞን በሕዝብ ከተወከሉ የተለያዩ የሕብረተሰብ ክፍሎች ጋር በወቅታዊ ሁኔታ ላይ መክረዋል፡፡

በዚሁ ወቅትም የውይይቱ ዋና ዓላማ “በክልሉ የተጀመሩ ሥራዎች እንዴት ማጠናቀቅ እንዳለብን በመነጋገር የመፍትሄ ሐሳቦችን ለማስቀመጥ ነው” ብለዋል፡፡

የትግራይ ሕዝብ አሁን ላይ ከመቼውም ጊዜ በላይ ሰላምና አንድነት ያስፈልገዋል ያሉት አቶ ጌታቸው፥ በዚህም የክልሉ ሕዝብ የልማት ተግባራቱን እያከናወነ ሰላሙንና አንድነቱን መጠበቅ እንዳለበት አሳስበዋል፡፡

ሕዝቡ የጀመራቸውን የልማት ሥራዎች ከዳር ለማድረስም ይጠበቅበታል ማለታቸውን ኢዜአ ዘግቧል፡፡

ማንቼስተር ዩናይትድ በሜዳው በቶተንሃም ተሸነፈ

አዲስ አበባ፣ መስከረም 19፣ 2017 (ኤፍ ቢ ሲ) በ6ኛው ሳምንት የእንግሊዝ ፕሪሚየር ሊግ ቶተንሃም ሆትስፐር ማንቼስተር ዩናይትድን አሸንፏል፡፡

ምሽት 12፡30 ላይ በኦልትራፎርድ በተደረገው ጨዋታ ቶተንሃም ሆትሰፐር ማንቼስተር ዩናይትድን 3 ለ 0 በሆነ ውጤት አሸንፏል፡፡

የቶተንሃም ሆትስፐርን የማሸነፊያ ግቦች ቤሬናን ጆንስን፣ ኩልሴቭስኪ እና ዶሚኒክ ሶላንኬ አስቆጥረዋል፡፡

በማንቼስተር ዩናይትድ በኩል አምበሉ ቡሩኖ ፈርናንዴዝ ከእረፍት በፊት በቀይ ካርድ ከሜዳ ተሰናብቷል፡፡

ቀድም ብሎ 10 ሰዓት ላይ በተደረገ ጨዋታ ኢፕስዊች ታውን ከአስቶንቪላ 2 ለ 2 በሆነ አቻ ውጤት ተለያይተዋል።

በመዲናዋ በትራፊክ አደጋ የ2 ሰዎች ሕይወት አለፈ

አዲስ አበባ፣ መስከረም 19፣ 2017 (ኤፍ ቢ ሲ)በአዲስ አበባ ንፋስ ስልክ ላፍቶ ክ/ከተማ ወረዳ 14 ከገላን ወደ ሰፈራ በሚወስደው መንገድ ላይ በደረሰ የትራፊክ አደጋ 2 የመንገድ ዳር ችግኝ የሚንከባከቡ ሠራተኞች ሕይወት አለፈ፡፡

አደጋው በተለምዶ ሰፈራ ተብሎ በሚጠራው አካባቢ ከቀኑ 11:30 ላይ አንድ ሲኖትራክ ተሽከርካሪ እና የህዝብ አይሱዙ ተሽከርካሪ ተጋጭተው ነው የደረሰው፡፡

በዚህም የሁለት ሰዎች ሕይወት ማለፉና በ4 ሰዎች ላይ የአካል ጉዳት እንዲሁም ለጊዜው ግምቱ ያልታወቀ ንብረት ላይ ጉዳት መድረሱ ተገልጿል።

በአደጋው ጉዳት የደረሰባቸው ዜጎች ሕክምና እየተከታተሉ መሆኑንም የክ/ከተማው ፖሊስ መረጃ አመላክቷል።