過去一日天清氣朗，比起前兩日見返多咗陽光，天氣又變返較為炎熱。由衛星雲圖見到，香港今日進入副高晴空區，但中国廣東內陸晏晝時都有少少零散雨雲。

相比起7月果陣嘅長命熱，今次副熱帶高壓對珠三角地區嘅控制較弱，一兩日嘅天晴曝曬之後，容易出現高溫觸發既過雲雨。但整體都係以高壓主導下嘅天晴天氣為主。

另外值得一講台灣東南面有個螺旋形既雲團。佢嘅前身係早前三旋共舞果陣提過，係副高內部發展嗰個熱帶低氣壓。佢一路畀副高下沉壓制，吊住命咁一路行到台灣以東；最終都係被氣象機構降格為普通嘅低壓區。

不過有趣嘅係，當初呢個熱帶氣旋橫過日本小笠原群島海域果陣遇上火山爆發，捲入左唔少火山灰（右圖所示，圖片來自台灣颱風論壇專頁），台灣方面畀咗個稱呼佢，叫做「火山灰低壓」，而依家佢嘅軀殼繼續西行進入南海；

咁香港有無機會因而見到佢連帶吹過嚟嘅火山灰呢？可能就唔大機會嘞。一嚟佢都越來越弱，二嚟經過咁遠路程火山灰濃度都已經低咗好多；三嚟呢堆殘餘雲團組成嘅低壓區較大機會繼續由副高引導到中国廣東西部，同香港保持一段距離，所以睇怕我地都無乜機會係香港見到天降火山灰嘅奇景喇。

#臨訓天氣貼士 #氣象趣談

容我地狡辯一下，氣象巴打尋日先講完之後幾日雨勢應該無咁大，今日就隨即炒粉。

理論上咁既預測並無問題，對比前兩三日有充足水汽提供，大範圍咁形成雷雨帶；今日水汽較少，其實得幾條雷雨帶。不過偏偏香港今日就中正其中最勁既一條。

人算不如天算，不過炒就係炒。

#氣象趣談