// 今晚6點半左右，我係鴨寮街公廁睇到一單令我心酸至極既事...

話說清潔婆婆係廁所清潔緊，有位女士不斷罵佢，之後個女士衝岀去門口但係又衝返入嚟拎個垃圾剷(應該係清潔婆婆既)，起勢咁扑，扑到枝棍斷晒，連個垃圾鏟舊膠都碎開晒。

我聽見打鬥聲之後立即跑去睇下婆婆情況，婆婆跌低左坐係地上，清醒無見血，可惜打人果個女人已經跑走逃之夭夭。於是我就陪婆婆等救護車。

等候期間，我聯絡婆婆的同事表示佢受傷開唔到工，但婆婆可能害怕失去工作，唔想入院（但佢個頭腫咗雞蛋咁）之後有警察到場，問左相關資料事發經過。警察卻冷冷表示睇婆婆追唔追究再算，仲用好唔友善既態度同婆婆講：「嗱，你自己同你主管交待咩事啦！」

我想講，襲擊傷人唔應該等受害人話追唔追究而去決定，而係有責任去處理。一個八十一歲既婆婆因為生計而要硬住頭皮返工，無啦啦俾人打到咁而無半句慰問，仲用咁既語氣同受害人講野，究竟係乜嘢人黎。

到底係一個乜野樣既「吃人」社會，令一個81歲既婆婆連無故受傷都唔想話比公司知，驚影響工作；而嚟到處理既警察完全唔似想搵出施襲者，而係一心唔想做野既樣去處理件事。

呢個政府，到底比咗啲乜野香港人。 //

Source: 城市花園 仇栩欣 Facebook

#黑警
#沒有無原故的恨