#他鄉遇故支

尋日係 #Aberdeen Doors Open Day，除咗博物館同教堂，估唔到連 #孔子學院 都加入開放行列。原本都冇打算去，但既然一場嚟到，咁就順道去睇吓。

入到去印象最深刻嘅係，佢哋果然係秉承 #中華文化，特別係 #神功戲 留座嘅傳統，明明市內所有開放活動呢日都人山人海，但偏偏孔子學院裏面一個人都冇。室內主要係古箏同圍棋體驗，當我同手足去參觀嘅時候，佢哋亦都冇講解同邀請我哋參加活動，似乎係暗示：「呢幾個位你哋唔坐得㗎！」。睇見佢哋凝重嘅眼神，有感佢哋認得我，但偏係唔同我打招呼同埋故意迴避，莫非佢哋亦都係體現緊農曆七月「唔好嗌人全名」同埋「不要拍膊頭」呢兩個 #中元節 傳統？

裏面仲有一塊紅色版貼住幾幅人相，我冇戴眼鏡睇唔清楚裏面啲細字，莫非呢幾個就係孔子後人？哎呀，唔記得買元寶蠟燭香參拜添，願佢哋早登極樂，早啲安息！

然而現場其實仲發生一件事，相當詭異：有一名身穿「你好」紅色上衫嘅亞裔女子，喺我哋身旁迅速走過，當我哋預備離開嘅時候，發現佢喺一樓凝望住我哋，更加神奇嘅係只要相機鏡頭對住佢，佢就會消失⋯⋯真係唔好唔信邪😰