【黃標精選師｜港人記住要互相支持鼓勵】

剛剛過完農曆新年，就傳嚟移英年輕港人嘅不幸消息，大家心情都唔好受。老實講，Charlotte初嚟英國，就係冬天，天氣凍又早天黑，加上成日無所事事咁，情緒係有啲低落，甚至會懷疑自己嘅決定。為免自己繼續胡思亂想，我就決定即刻搵份簡單嘅工返吓，又去參加Welcome Course識吓新朋友，不知不覺冬天就過咗，迎嚟天氣正到不得了嘅春夏天，之前嗰種鬱悶心情亦消失咗。

Charlotte嚟到英國後，都識咗唔少單拖嚟朋友，我好佩服佢哋嘅勇氣，經濟壓力當然一定有，住Share House遇到難頂嘅室友，就更加唔開心。我哋自問未必幫到太大忙，但至少耐唔時可以一齊食飯，好天又約埋一齊去玩、打吓波，互相支持鼓勵。

生活壓力唔係單拖嚟嘅朋友先會有，之前參加Welcome Course認識嘅朋友，就算係一家大細嚟一樣有唔同嘅壓力，除咗驚英文唔好、搵唔到工、識唔到朋友，亦有媽媽俾嚟到唔適應嘅仔女怨，令到佢好傷心。當然，大家傾吓偈雖然未必即刻解決到問題，但至少心情好啲，尤其係大家都係過來人，好明白大家面對嘅困境，你會知道唔係得自己一個。

英國有好多支援移英港人嘅組織，但最緊要係自己知道自己需要搵幫手，唔好收埋喺心入面。好似早排Reading嘅港人組織，就幫一位被迫離港嘅年青人眾籌大學學費，結果1日就超標完成，足以反映呢度嘅香港人都係好有愛。

作者：Charlotte
逢周六英國時間上午11時 / 香港時間下午7時刊出

全文請到Patreon免費閱覽
https://www.patreon.com/posts/77845578

#黃標精選師 #專欄 #香港人 #同路人 #互相支持