#多謝蘋果 陪伴我哋成長26年，雖然唔敢講話100%報導真相，但係蘋果卻係傳媒中最敢為公義發聲。每次大型遊行集會中，都總會有 #蘋果日報 嘅身影，甚至一片「蘋果海」；佢哋都不惜放棄豐厚廣告收入，利用珍貴嘅頭版位置製作訴求標語。蘋果更設有 #蘋果日報慈善基金 ，為無數經佢哋揭露嘅弱勢基層提供財政支援。

#多謝蘋果記者 一直以來對 #航陣 嘅支持、關注同體諒。航陣成立16個月以嚟，已經至少10次出現喺蘋果報導之中，係眾多傳媒之中最捧場嘅。由航陣籌委會成立初期開始，蘋果記者已經不時同我哋聯絡，希望了解我哋嘅最新動態。到我哋上年成功登記之時，蘋果記者更加比我哋早搵到相關憲報公告，並即時相約我哋喺第二次入會街站嘅時候進行專訪。每次我哋開記者招待會，蘋果記者都一定會出現，甚至試過係唯一嘅出現。每次航空業界有大事發生，蘋果記者都總會聯絡我哋，哪怕仲有半粒鐘截稿，佢哋都會體諒我哋義務工作嘅困難，耐心等候我哋回覆。

蘋果日報堪稱香港商業傳奇，佢嘅手法、風格、果敢、貼地、良知都幾乎空前絕後。有參與過傳媒工作嘅理事都稱讚蘋果日報員工關係同士氣係全行數一數二。

無奈呢間咁深入民心嘅企業喺極權嘅粗暴扼殺下被迫退下火線，令800名蘋果員工痛失飯碗，令香港失去一把公義聲音，令弱勢基層喪失有力支援，令第四權從此在香港熄滅。再次證明近年香港人嘅訴求並非一日之寒。

在此，航陣理事會祝願各位蘋果員工前程順利， #好人一生平安 ， #香港人加油 。

二零二一年六月二十四日



PS：尋晚我哋已經將所有有紀錄嘅蘋果航陣報導backup，記者們嘅努力唔會白白浪費。