最近討論得非常熱烈嘅不外乎係刺客信條終於出咗萬眾期待嘅一集，就係日本為題嘅《刺客信條．暗影》 ，但係換嚟嘅係無數fans嘅負評，條trailer甚至有21萬負評，點解呢？今次想同大家探討幾個問題 1.乜嘢係武士 2.點解今次會引起咁大嘅迴響？3.彌助喺史實又係咩人？
首先問題來源係Ubisoft今次嘅男主角選角就揀咗黑人彌助作為參考並且稱之為武士更斷言佢會係解放日本嘅人，但係呢個有咩問題？

喺日本史實入面的確係有彌助呢個人喺討論之前黑人彌助係唔係武士之前，我哋首先要了解咩叫做武士。

武士係喺10世紀到19世紀期間嘅一個社會階級，原本係接受文武合一嘅教育，負責文政或者打仗嘅貴族階級，喺後來先至衍伸到通刀法、刀不離身嘅日本劍客，但係貴族觀念依然都喺度，喺四民等級入面最高嘅正係武士，更加唔少人會用西歐嘅騎士作比較

武士有分上士，下士，上士換言之啫係上級武士包括咗大將軍、大名、旗本呢啲有官職有封地嘅貴族，而下級武士大多數係沒落貴族嘅後人（又稱鄉士）或者被藩府免職嘅浪人，雖然有貴族血統但係唔再受到重視。

而下士亦可以畀幕府或者藩聘請返去做足輕（步兵），只係空有姓氏同帶刀權嘅呢啲身份象徵嘅權力，唔講住所同衣着有幾兜踎，份糧都只係啱啱夠揾食，唔會好得過百姓幾多，不過因為可以靠戰功，出路點都好過平民。

同時仲有一款叫在野武士，呢班人係地方上有錢有勢，而組織咗武裝私兵嘅土豪，佢哋往往會喺當地有唔少嘅影響力，通常會畀當時嘅統治階級吸收，亦會賜佢哋一個姓氏等佢哋擠身貴族，但係喺建制上都只係下士入面嘅鄉士。

講到呢度，大家有冇諗起邊位武士，係戰國時期嘅織田信長、明智光秀？江户德川時期嘅佐佐木小次郎、宮本武藏？又或者係幕府末期嘅阪本龍馬同近藤勇？

未完待續 #刺客信條 #日本武士 #彌助