卻說小編喺睇電視嘅時候，無意間發現TVB《智能愛人》入面某個小朋友好熟口面，原本我都茫無頭緒，但睇睇吓唔單止覺得小朋友似曾相識，連情節走向都同ViuTV劇集《理想國-苟延殘喘》一模一樣，我Google完之後，發現原來TVB真係可以咁無恥，將同一個橋段複製之餘，搵返同一個小演員返嚟拍攝🤡

兩者劇情都係講述有個虎媽迫小朋友(徐嘉謙飾)不斷溫書、做練習，小朋友忍咗好耐，最終跳樓自殺。虎媽傷痛欲絕，佢老公為咗氹老婆，於是向AI工廠訂製咗個同自己個仔一模一樣嘅AI返嚟一齊生活，不過老豆就好理智，分得清AI同真人，老母就好感性，當正個AI係親生仔...

點解會出現咁相似嘅橋段呢，有網民提示，原來《理想國》、《智能愛人》嘅監製同編審都係陳翹英（編劇則有所不同），唔怪得之喇... Self-plagiarism得唔得㗎？

如果你哋都發現《智能》同邊套劇集嘅情節都非常「雷同」嘅話，歡迎喺下面留言分享吓😉

*補充資料，《智能愛人》由大棧贊助💙

#TVB #老人台 #智能愛人 #ViuTV #理想國

《如果TVB鍾意理想國，不如搵王敏奕翻拍呢集...?》2 Sep

尋晚講到TVB劇集《大棧贊助：智能愛人》嘅部份劇情同ViuTV《理想國》如出一轍，連飾演AI囝囝嘅演員都係一樣，皆因兩套劇集嘅監製、編審都係陳翹英，有一稿多投(Self-Plagiarism)之嫌，不過小編就覺得，如果要抄不如抄盡啲，抄埋其他單元嘅劇情，例如「後美好時代」(Good News Days)。

「後美好時代」劇情講述喺未來嘅香港，AI技術漸趨成熟，True TV電視台高層決定引入一名AI女主播(王敏奕飾，現為TVB藝人)，報導有助政府維穩嘅「淨化新聞」，因為佢哋認為AI主播比真人主播更易操控。AI主播自誕生以嚟，就係接收「淨化」資訊瞭解世界，所以一直都以為社會係歌舞昇平、政府積極解決房屋問題、議員會幫助貧苦大眾之類。

然而，假象終歸係假象，假新聞係平息唔到真民怨，一班被政府不當施政影響，同時受True TV假新聞禍害嘅市民終於忍無可忍衝上True TV電視台示威，被AI主播目睹。AI主播如夢初醒，得悉自己原來一直係溫室小花，活喺True TV構建嘅「美好世界」當中，佢怒斥同事、上司缺乏傳媒道德，扭曲真相，並決意要喺大氣電波將真相公諸於眾，之後就... 唔劇透喇😂

如果TVB要翻拍呢一集劇情，相信可以得心應手，因為最好嘅演員已經喺晒新聞部，連飾演主播嘅王敏奕亦已經簽咗TVB，就爭在TVB有無勇氣拍出嚟😉

《理想國》鏈結：https://viu.tv/encore/the-republic

#TVB #老人台 #大棧 #智能愛人 #ViuTV #理想國