行人危站將軍澳隧道出口往觀塘快線 嚇窒司機

道路駕駛者真係無時無刻都要一眼關七，周三（10日）夜晚九點幾，有一名「人士」企咗喺將軍澳隧道出觀塘方向嘅快線位置踱步，如果有司機揸歪少少，就隨時都會撞倒佢，真係險象環生。Channel絲睇返事發當時嘅車Cam片，片中嗰位人士着深色衫、白色鞋，加上企喺白線之上，成個人就好似有保護色一樣，司機稍不留神已經未必睇得清楚。

雖然唔講都好多人知，但Channel絲再提提大家，咁樣除咗危險仲係犯法㗎。根據《道路交通（快速公路）規例》第7條，任何人除非身在汽車之內或之上，否則不得進入、使用快速公路或在其上停留，一旦被定罪，最高可被罰$5,000及監禁3個月。

#channelchk #車Cam #公路 #將軍澳隧道 #觀塘繞道