To我愛的XXX:
之前都有分享過喺牆內嘅特別日子係點過,例如新年、聖誕、中秋,病咗⋯呃⋯依個好似唔算⋯好啦!就仲有一個日子冇講,啱,就係生日啦!喺牆入面嘅生日都係特別,尤其對只坐一兩碌嘅人,嗰一兩次牆內生日一定係終生難忘。
小弟喺牆內都差唔多20隻,必定係經歷過牆內嘅生日,上年小弟第一次牆內生日可以話係異常低調,因為荔枝角私飯期仲有酒嘅日子,傳統係生日嘅壽星仔必定要同全期數人對飲,全期數⋯姐係最少30人,仲要係紅酒,更加係必需飲到湯先可以收貨。小弟親眼見有手足湯到全廁所「紅豆沙」嘅可怕場面,所以有人會選擇刻意令自己湯,快快了事,不勝酒力嘅小弟自然係低調行事。選擇低調嘅唔止小弟一位,有一日我行過走廊,「木,過嚟同我飲。」我循聲望去,係一位上咗年紀嘅手足桂叔,手中遞上紅酒俾我。「我唔飲酒㗎。」我笑一笑伸手拒絕咗桂叔。「一啖仔啦。」桂叔輕輕喺我耳邊講「今日我牛一。」「吓!?等我同⋯」「等等!」桂叔立刻拉住我。「唔好講,你知就得啦。」我望住桂叔。桂叔只係繼續遞上紅酒。露出和藹嘅笑容。冇得避,我接過酒杯。「生日快樂。」輕輕一句之後飲咗一啖。「多謝。」桂叔同我對飲咗一啖就再冇開口,眼神穿過紅酒杯望向窗外,好似諗緊的乜咁。「你個仔呢?有冇嚟?」我見氣氛有啲尷尬,只好搵啲話題講吓,冇理由又桂叔生日我飲一啖酒就離開「都係咁啦。」桂叔無望我,問非所答。我都冇再問落去,我望左望窗口,再望下桂叔,桂叔滿臉皺紋,喺嘴邊微微摺起,到底係微笑緊定係搣嘴緊呢?「出冊⋯生日去飲茶囉⋯」「好啊。」,隔離廟係「咆哮山莊」,依邊一老一少,靜靜,低調咁過咗一個手足嘅生日,靜靜一人過生日,總好過要喺大棚強行歡笑講「多謝」。
小弟都選擇咗低調,只不過生日當晚係星期日,《萬千寵愛》立刻就掀穿我生日,好彩,當時一早過咗晚飯,後來更加係禁酒,生日紅豆沙就成為絕響。今年生日,小弟收到生日卡,朋友寫咗一句「希望你今年生日過得特別啲」,嗯,我都咁保證今年生日係人生中最特別,因為我朋友開口中,今年生日小弟竟然要上court呀!仲係初審,冇人睇!唔好話慶祝,一個人都唔會嚟到睇小弟,夠晒特別。好彩比我撞正發仔同一騎上court,起碼呀迪同呀廷都同咗小弟講「生日快樂」。「喂!上年又係你陪我過生日,今年又係,我坐咗呢兩年都係你陪我過生日喎!」我話「係喎!哈哈!最多下年你生日我拜你山啦!」發仔話。「屌你啦!」
特別嘅生日⋯上court生日真係畢生難忘。
尚千赴戎
木何懼火—————————————
Patreon:
https://www.patreon.com/wood_wordbeyondwallFacebook: 尚千赴戎 木何懼火
Instagram: Word.beyond.wall
MeWe: wood_wordbeyondwall
請大家多多支持
🙏🏼💪🏻❤️