小編探訪札記 #63

#2022年3月4日

#荔枝角收押所

#63

今篇札記實為「小編冇得探訪札記」。

小杰牆內修煉已經去到第63日，距離小編2月4日最後一次見佢，已經足足有一個月嘅時間冇見過佢了。呢一個月嘅日子相信比起泊正嘅日子更艱難，因為泊正之後起碼每個月都有2次探訪，而家停止探訪足足一個月，仲要擔驚受怕小杰喺牆內嘅疫情。信件又嚴重濟後，平均一星期先收到一次佢寄出嘅信，即使維持有書信來往，卻永遠都追唔上雙方生活嘅步伐，基本上我哋真係生活喺兩個時空咁。小編希望而家，已經係我哋經歷最差嘅景況，將來唔會有更差嘅出現。

昨日收到小杰俾小編嘅信，都略略同大家交代一下佢喺牆內嘅情況：

//荔枝角疫情嚴重，昨天有廚房人中咗，然後全世界食普通飯嘅人都變成有得食私飯外賣，不過都只係大家樂，我啲飯都係好食啲嘅。有啲黑手話咁多年嚟都未試過咁嘅安排。聽聞我哋期數係全收押所幸存嘅2個期數，冇人感染，其他全部有確診。而家我哋每日都會做檢測，我今日報咗名打疫苗喇，最後我都選擇打復必泰，我唔想日後因為疫苗問題影響探訪，我擔心出面嘅你哋呀，我呢到反而好安全，我擔心我媽同bb（澄清係小杰妹妹個bb，小編冇bb），啲新聞都幾得人驚，幫我問候signal gruop裡面我所有嘅朋友，我很想你們！

呢個星期我沉迷咗《炎炎消防隊》，同埋東野圭吾《沉默的遊行》，我成日都有睇相，原來相片一個月最多可以入60張，20張收到之後我可以額外再申請多20張，咁以後可以入多啲俾我喇！我知道好多人俾利是我，幫我逐一多謝佢哋，多謝佢哋咁照顧我，我下世都還唔完人情債。裡面好多人都冇信收，我其實每次收信都差唔多十幾廿封，有點開心。// 寫於22年2月22日。

仲記得第一日去收押所探訪時候，聽到一位阿姐問：「阿蛇，想問你哋初一至初三開唔開㗎？」白髮高級懲教阿蛇相當冷靜睿智地回答咗一句：「地球唔爆炸，我哋唔放假。講完。」當日簡而精嘅說話，今日俾一場疫症破攻了。裡面啲黑手話收押所咁耐以嚟係未試過停運作，相信世上只有人為COVID嚴重過地球爆炸。

最後，思念係無限嘅。我哋幾時會再見？

－－－－－－－－－－－－－－

歡迎大家寫信俾小杰！詳情請留意之前發佈嘅文章🌻

小杰 SiuuKit Patreon