【初選案還押一周年】

望望日曆，上年嘅今日係初選案47人去警署報到嘅日子。

猶記得報到前同吳生嘅最後一次對談，佢好凝重咁話今次報到佢都唔知出唔出得返嚟。吳生不嬲都好少「過份憂慮」，面對呢個情況，我唔識得回應，淨係講：「無事嘅！🥲」

事實證明，佢真係無「過份憂慮」。

呢一年，相信除咗47人之外，每一位家人嘅生活都有翻天覆地嘅改變。除咗要面對好多自己從來無諗過有需要學習嘅法律程序，仲要奔波勞碌去探訪、搵物資、同埋學習適應屋企「少咗一個人」嘅日常生活。呢一切一切都非常唔簡單。

至於朋友，都過得唔容易。小編最大嘅感想係:「現實真係一顆煉金石，但我未準備好被煉呀…😅」

小編無想像過自己有一日會做小編，亦無諗過原來做朋友都需要無比毅力，要持之以恆咁關注同投放心力。坦白講，喺正常嘅日子小編邊有咁多時間得閒就問下朋友「近況如何呀？」、「心情如何呀？」。但喺呢啲日子，自己都會重新思考，如果每個人嘅關心都唔表現出嚟，唔得閒「煩」下朋友，朋友根本唔會知道自己有人關心佢，特別係喺呢啲日子，如果「被遺忘」，感覺應該會更難受。

雖然每個人嘅經歷都唔同，但同時亦都大同小異。一年剛剛過去，小編想同每一位關心47人案嘅親友講聲：

「辛苦了🙇🏻‍♀️」

同時亦都想感謝每一位仍然關注吳生嘅朋友。小編知道，能夠到而家呢一刻都堅持默默關注都已經係一件非常唔容易嘅事，亦都好感激呢一年嚟曾經幫助過吳生或者關注組嘅朋友，雖然現實係充斥住巨大嘅無力感，但起碼我哋唔係孤獨，我哋仍然可以互相扶持🫂。

最後，希望各人都可以平安，案中嘅每一位都可以盡早歸來同親友團聚💛。

⭐ 支持吳政亨(李伯盧)關注組 Patreon：
https://www.patreon.com/GordonNgConcernGroup
---------------------------------
吳政亨（李伯盧）關注組