小編探訪札記 #35
#2022年2月4日
#荔枝角收押所
#35
今日收到最差嘅消息就係由聽日（初五）開始停止所有探訪。學邵家臻話齋：「一刀切停止所有探監活動（還柙和定罪人士），則未免太粗疏和粗暴了。」今日直接地成為咗判刑前最後一次嘅探訪，有冇搞錯呀？判刑後身份唔同咗就即時變做一個月得2次親友探訪，唔能夠再日日都探。冇喇喇今日係Last Day，真係令人又嬲又沮喪。我即刻腦運轉，我有冇咩要話俾佢知？我有冇嘢要入但未入俾佢？好panic。
好在今個月要入嘅物資初二嘅時候已經入咗，書本方面都叫做入咗本國家地理雜誌俾佢等佢冇咁悶，可惜2月11日上庭嗰套衫，我入唔到俾佢喇，佢只可以穿著番12月31日入還柙時嘅衣服，又臭又污糟又多塵，最緊要係唔夠暖呀，冇喇，而家冇得入新一套衫俾佢喇，真係唔明，又學邵家臻話齋：「院所的防疫的方法有很多。例如分流、訂出每日探監名額、視象探訪、不准探訪但准入物資（每月月頭是入物資的日子）等。總之，一下就停止所有探監活動，叫人情何以堪。」唉，想喊。
今日一見面就同小杰講咗呢個壞消息，大家都好無奈，都係覺得低能政策，但可以點呢？梗係唔捨得喇。今日冇咩公務要匯報，好快就已經係閒聊，小杰表示都係食唔安瞓唔落，私飯碟飯好大兜，佢成日食唔哂（其實佢真係唔大食，唔好俾佢身型呃到），裡面好凍，冇信收好悶。佢開始見到另一邊10月1日黃大仙案件嘅人，相認之後都係一齊唏噓。小杰2月7日下午需要覆診，小杰就話通常一早就會帶佢去醫院等，等到下午，我話「吓？咁浪費時間嘅！」真係等到懷疑人生。我話「不如試下去醫院捕你」佢話可以㗎，因為佢都冇特別通道走，其實反而係鎖住鐵鏈好招搖咁坐喺到等見醫生。佢講完之後我即時諗番起2019年10月2日凌晨5點我飛的去QE捕佢嘅嗰一刻，嗰一個畫面係我永遠都會記住：
離遠見到佢喺急症室大堂一張病床上面，兩邊企住警察，佢手腕鎖上手扣連住病床，佢冇咗副眼鏡，我去到嘅時候佢未能夠第一眼就見到我。由於我唔能夠同佢對話，我只可以保持距離咁觀察佢，或者等到小杰留意到我。嗰一刻就係我第一次明白乜嘢叫做「最遙遠嘅距離」，的確係我企喺小杰前面，但小杰唔可以同我交流。我一直喺急症室大堂徘徊，佢終於朦朧地見到我，佢睜大那雙小小的眼睛彷彿唔相信眼前見到嘅人係我，係嘅，凌晨5點喎，咁都捕到佢喺QE。我對佢微笑，當然伴隨住兩行眼淚，佢造口形叫我走，叫我番屋企，痴線，嗰一刻唔會有人山長水遠飛的嚟然後只係望一眼就走囉。我一路徘徊，甚至乎行近佢床邊，扮哂嘢，總之就係俾小杰知道「I am here with you」，一陣佢就見醫生，然後我就目送佢上骨科病房。冇任何嘅說話可以講，警察不停盯住我，但嗰陣每一個眼神已經means a lot。當時喺醫院自己一個喊咗好耐，朝早7點先離開醫院，基本上由事發一刻都第二日都係冇瞓過。
言歸正傳，所有回憶都好似flashback咁，到而家呢一刻仍然歷歷在目。ok，最後6秒我先醒起係真係「最後」嘅時間，我爭住講咗一句「我愛你！」佢回應同樣嘅字句，又一次「咇」一聲，夠鐘放低聽筒，同探訪朋友一齊左右行，依依不捨咁揮手。下一次見面已經係2月11日1430。
小杰 SiuuKit Patreon
#2022年2月4日
#荔枝角收押所
#35
今日收到最差嘅消息就係由聽日（初五）開始停止所有探訪。學邵家臻話齋：「一刀切停止所有探監活動（還柙和定罪人士），則未免太粗疏和粗暴了。」今日直接地成為咗判刑前最後一次嘅探訪，有冇搞錯呀？判刑後身份唔同咗就即時變做一個月得2次親友探訪，唔能夠再日日都探。冇喇喇今日係Last Day，真係令人又嬲又沮喪。我即刻腦運轉，我有冇咩要話俾佢知？我有冇嘢要入但未入俾佢？好panic。
好在今個月要入嘅物資初二嘅時候已經入咗，書本方面都叫做入咗本國家地理雜誌俾佢等佢冇咁悶，可惜2月11日上庭嗰套衫，我入唔到俾佢喇，佢只可以穿著番12月31日入還柙時嘅衣服，又臭又污糟又多塵，最緊要係唔夠暖呀，冇喇，而家冇得入新一套衫俾佢喇，真係唔明，又學邵家臻話齋：「院所的防疫的方法有很多。例如分流、訂出每日探監名額、視象探訪、不准探訪但准入物資（每月月頭是入物資的日子）等。總之，一下就停止所有探監活動，叫人情何以堪。」唉，想喊。
今日一見面就同小杰講咗呢個壞消息，大家都好無奈，都係覺得低能政策，但可以點呢？梗係唔捨得喇。今日冇咩公務要匯報，好快就已經係閒聊，小杰表示都係食唔安瞓唔落，私飯碟飯好大兜，佢成日食唔哂（其實佢真係唔大食，唔好俾佢身型呃到），裡面好凍，冇信收好悶。佢開始見到另一邊10月1日黃大仙案件嘅人，相認之後都係一齊唏噓。小杰2月7日下午需要覆診，小杰就話通常一早就會帶佢去醫院等，等到下午，我話「吓？咁浪費時間嘅！」真係等到懷疑人生。我話「不如試下去醫院捕你」佢話可以㗎，因為佢都冇特別通道走，其實反而係鎖住鐵鏈好招搖咁坐喺到等見醫生。佢講完之後我即時諗番起2019年10月2日凌晨5點我飛的去QE捕佢嘅嗰一刻，嗰一個畫面係我永遠都會記住：
離遠見到佢喺急症室大堂一張病床上面，兩邊企住警察，佢手腕鎖上手扣連住病床，佢冇咗副眼鏡，我去到嘅時候佢未能夠第一眼就見到我。由於我唔能夠同佢對話，我只可以保持距離咁觀察佢，或者等到小杰留意到我。嗰一刻就係我第一次明白乜嘢叫做「最遙遠嘅距離」，的確係我企喺小杰前面，但小杰唔可以同我交流。我一直喺急症室大堂徘徊，佢終於朦朧地見到我，佢睜大那雙小小的眼睛彷彿唔相信眼前見到嘅人係我，係嘅，凌晨5點喎，咁都捕到佢喺QE。我對佢微笑，當然伴隨住兩行眼淚，佢造口形叫我走，叫我番屋企，痴線，嗰一刻唔會有人山長水遠飛的嚟然後只係望一眼就走囉。我一路徘徊，甚至乎行近佢床邊，扮哂嘢，總之就係俾小杰知道「I am here with you」，一陣佢就見醫生，然後我就目送佢上骨科病房。冇任何嘅說話可以講，警察不停盯住我，但嗰陣每一個眼神已經means a lot。當時喺醫院自己一個喊咗好耐，朝早7點先離開醫院，基本上由事發一刻都第二日都係冇瞓過。
言歸正傳，所有回憶都好似flashback咁，到而家呢一刻仍然歷歷在目。ok，最後6秒我先醒起係真係「最後」嘅時間，我爭住講咗一句「我愛你！」佢回應同樣嘅字句，又一次「咇」一聲，夠鐘放低聽筒，同探訪朋友一齊左右行，依依不捨咁揮手。下一次見面已經係2月11日1430。
小杰 SiuuKit Patreon