【生日願望】

今日星期日，狂風暴雨，「冇街行」(監獄球場露天既，落雨就冇得走動)，睇書睇到好眼瞓，但環境嘈雜難以入睡，我唯有寫吓廢話打發時間，暫時逃避一下監房無止境既苦悶。

就快生日但我無乜野好慶祝，上年生日香港發生咗大事，有人犧牲左，我既生日成為咗同路人既死忌，難以亡(忘)懷。

快要踏入「而立之年」(三十而立)，我既願望除咗早日出冊，就係堅持「獨立」，唯有咁先可以得到真正既自由。

自從2014年我就冇放棄過爭取自由，即使身處逆境，亦唔想放手，因為「人無夢想同條咸魚有咩分別？」喺監獄我感覺已經慢慢失去人既尊嚴，成為動物同牲畜一般，每日「食、做同瞓」喺度我變成工作機器，唔需要思考咁做嘢，工作本能咁自動自覺，諗都唔使似直覺。日復日既工作習慣咗之後成為咗自然反應，有時邊諗其他嘢邊工作，會意識唔到自己做緊野(直至旁人叫我)。而家我一收工就想瞓(體力勞動大)，但再眼瞓都一定要睇吓書，因為要啟發自己思考，睇書係唯一可幫助我想想自由既工具，喺牢獄中尋找一小片自由空間。

喺獄中我進修完兩個課程，想讀多個但工作忙，越來越冇精神，冇力再做功課。食飯時間成日有人問我點解嗰樣咁憂愁，但我其實唔係愁(至少食野時不太愁)，而係好攰，我唔係愁眉不展而係一臉倦容(照鏡先知)。

啱啱坐監時有朋友叫我唔好「慣咗」入面的「生活」(沒有活)，但其實唔使擔心，每坐幾個月都有一兩次大變故，連工作都變。同出面既香港人一樣環境根本唔俾我「慣」，但我希望大家既自由夢五十年不變，毋忘初心，堅持到底。

日日都唔夠瞓的K上
(一坐上床就瞓著左，唔記得鋪床，天光先醒)
7-9/6

抗爭點滴