「論遺忘」

一個一直唔敢執筆討論嘅題目，但因為近來自身嘅遭遇，多咗反思「遺忘」呢件事情。

老實講，未入黎之前一直覺得「被遺忘咪被遺忘囉，no big deal~」，仲記得喺出面嘅時候睇過杜啟華手足做一個訪問，其中有一條問題我到依家都仍然記得並經常問自己，無記錯好似係問「有無後悔過相信群眾？」something like that la~ 而我當時嘅答案係我有做或者無做任何一件事都唔係因為群眾，而係屬於個人嘅選擇，亦正如我有無被遺忘都唔會影響我當初作出嘅抉擇正確與否。

但當自己真正身陷窘境，經歷一段時間嘅牆內生活過後，發覺自己無辦法唔去在乎「被遺忘」呢個問題。當一切迹象話緊俾自己聽自己正在被漸漸遺忘，無論係認識還是不認識嘅人都正在遺忘，作為一個有血有肉有感受嘅人，係無辦法不感到難受。或者係我未能夠如歷史長河中各位先賢般心如止水，但「社會性死亡」嘅感覺確實帶來衝擊。而係牆內最容易被摧毀、亦都係我最想去維護、最後一樣誓死都要去守護嘅正正係對人同世界嘅信任。而呢種信任一旦崩塌，往後即使重獲自由亦絕非能輕易重建甚至乎係irreversible。

幸好，有賴得到家人與各有心人沿路嘅支持與陪伴，即使內心不斷受到「被遺忘」嘅餘波所衝擊，我仍然能夠守住對人同世界的faith，令其不至崩壞，令今日嘅我仍然能夠選擇繼續好好相信群眾，希望將來嘅我亦能夠磊落地相信。相信群眾，相信人，相信世界，而唔係覺得從前嘅自己too young, too simple, too naive and too on9, 正所謂「仍然要相信這裡會有想像」呀嘛～

U

———————————————-
More on Patreon https://www.patreon.com/walkwithu

walkwithu__