【21//22】

喺出返嚟之後呢兩個幾月，繁重嘅學業、各種嘅離別、資訊嘅衝擊，令我一直被困喺失語嘅狀態，冇辦法繼續去update呢個Patreon，一啲已寫嘅、想但未寫嘅，都擺埋咗一邊。

雖然大家為嘅唔係我嘅文字，不過承擔得起呢份責任，始終要對自己有所交代。

讓大家久等了。

- - - - -

過往幾年冇點用心寫過一篇認真嘅所謂年度總結，有時係自己懶，遲遲唔肯執筆，最後草草用幾句乜嘢時光飛逝哇咁又一年，或者乜嘢年份只係曆法循環只要有心每日都可以係新開始，懶係文青咁鳩噏吓，呃返一百幾十like然後自己感覺良好就算。

但更多嘅係失語。要消化整整一年嘅經歷，然後打返一篇真係有內容嘅文字，對於唔係恆常寫字嘅我嚟講，喺一日之內係冇乜可能做到，而我往往就係去到年尾呢日望住一個空白嘅notes，一粒字都嘔唔到出嚟。

一開始去構思點樣去講2021嘅時候，自己都係喺一個好hang機嘅狀態，唔知從咩方向去寫好，所以不如就講吓呢種失語嘅感覺。

2021年都係令好多人失語嘅一年，唔好講總結一年，入面是但一單嘢都足以令大家overload。或者係情緒太複雜，或者係資訊量太大，我哋冇辦法去梳理發生緊嘅事，更遑論去講自己嘅諗法，最後除咗嬲、無奈、麻木之外，就冇乜further嘅嘢可以討論落去。

所幸（？）嘅係，喺2021年我有近一半嘅日子係每日都喺度寫緊字。寫作除咗係用嚟同牆外人溝通嘅手段之外，更重要嘅係去幫助我梳理牆內外發生緊嘅事，喺寫嘅過程入面將各種直觀所得嘅資訊整合成一個屬於自己嘅narrative，去解釋俾自己聽我經歷緊啲乜嘢。

有線、蘋果、立場之後，真正屬於我哋嘅narrative，能夠真誠咁解釋呢個世界俾我哋聽嘅人只會越嚟越少。冇人講咪自己講，當全個世界都灌輸緊一個版本俾自己嘅時候，就係要靠自己嘅努力，用文字去訓練返自主去理解世界嘅能力。

所以我知道自己平時幾懶都好，2022年都唔可以俾藉口自己唔再去寫嘢。

我哋呢一年失去嘅話語，已經太多。

- - - - -

2021係令人失語嘅一年，

2022就係重新出發、摸索、尋路嘅一年。

來年就請大家多多指教。

- 建築生

建築生的鐵窗手記 Patreon