牆內日記——〈黑社會？〉

2021年7月19日 星期一 雨天28℃

同大家分享一樣野，如果喺監獄你有自殺或自殘傾向又或者比阿Sir驗身嘅時候，發現有唔尋常嘅傷疤，就會比阿Sir特別看護，例如坐要坐第一排， locker同被都會俾人打開晒黎睇，之後佢仲要俾人特別搜身同打開啲簿睇.今朝早我哋有呢個情況嘅人俾人check野嘅時候見到佢有寫自稱三合會成員嘅字句.俾人鬧左勁耐，仲要全部同佢同一個「字頭」都要俾人罰…
—————————————————-
尋晚臨瞓前，出現咗隻粉紅色嘅BB壁虎.佢哋班黑社會全部嚇到雞飛狗走,我哋防止今晚‘佢’會喺我哋瞓覺嘅時候搞我哋，所以我哋決定捉佢去廁所放生佢，但成班黑社會都好驚冇人夠膽掂，係呢個時候有個師兄一手捉住咗隻壁虎拎比佢哋睇 :又話黑社會，連隻壁虎仔都驚
俾我哋笑咗成晚.
—————————————————
今日我發覺係呢到，好多古惑仔都仲係停留係有人跟就係型，有得食毒品就係勁嘅階段.所以佢哋喺呢度其實全部都係小朋友咁，例如阿Sir鬧完佢哋，佢哋喺阿Sir背後鬧翻佢，但阿Sir聽唔到就係型，阿Sir比自由我哋佢哋就目中無人.呢啲情況每一日都發生緊。
重點係佢哋仲會睇住我哋懶型又打晒眼色咁，真係好難俾反應佢哋，當我自己覺得我同佢哋格格不入嘅時候，我反而笑咗出嚟同時比到我動力去做好自己.

今日睇新聞見到有個手足被判左三年零九個月，不禁令我諗起仲有兩日就到自己…唯有積極面對:)

見字坐直、見字飲水

by:正面男孩

-
正面男孩-係因為真人真係好正面的！但佢同同齡既人冇分別，都係中意成班人一齊癲下但再正面都好都會有受傷既一刻，所以大家要陪佢行落去啊！
佢仲好中意食朱古力㗎，拋緊嘅時候為咗唔俾老積收朱古力，一次過食五包朱古力，搞到第二日病咗…( ･᷄ὢ･᷅ )

-

IG全文閲讀只限首數篇 之後想繼續睇就記得訂閱Patreon!
Patreon「橋上的人」: patreon.com/onthebridge2
​Instagram: @onthebridge2
​Facebook: 橋上的人

橋上的人 onthebridge2