【👩🏻‍🏫第37週羅湖私飯專業推介】

《劣食榜》

第三名: 橙 🍊
曾經係大欖私飯排行榜嘅第一位，嚟到羅湖變咗劣食第三位。額外每餐加$10先有嘅橙，睇落好大好靚，但敗絮其中，厚皮、爛、酸，私飯最重要嘅元素，令人大跌眼鏡！
⠀⠀⠀⠀⠀⠀⠀⠀⠀⠀⠀⠀⠀⠀⠀⠀⠀
第二名: 福建炒飯 (午)
到底福建炒飯係咪來自福建呢？
呢個問題應該得福建人先知，而呢個飯就絕對有FuKing味，茨汁一大pat但唔知咩味，配料極普通，雪藏蝦仁冇味又極細粒，我寧願佢就噉整個蛋炒飯算。
⠀⠀⠀⠀⠀⠀⠀⠀⠀⠀⠀⠀⠀⠀⠀⠀⠀
第一名: 味菜牛柳絲 (晚)
味菜即係邊幾味菜呢？
又係求其炒一堆茨汁，濃味過大棚飯，但仍然唔知嗰汁包含咩成份。牛柳絲被鬆肉粉醃到變咗冇肉味嘅啡色香口膠，要辛苦地係堆「味菜」入邊揀出嚟。$150嘅晚餐我不如食大棚飯好過，個廚師對唔對得住自己套制服！
⠀⠀⠀⠀⠀⠀⠀⠀⠀⠀⠀⠀⠀⠀⠀⠀⠀
《美食榜》

第三名: 鴛鴦 ☕️ (飲)
我人生中第一次飲鴛鴦，原來奶茶同咖啡可以夾得咁天衣無縫，有奶茶嘅香滑，亦有咖啡嘅濃厚；可能唔關私飯質素事，純粹係我冇飲過鴛鴦。
⠀⠀⠀⠀⠀⠀⠀⠀⠀⠀⠀⠀⠀⠀⠀⠀⠀
第二名：鹹蛋蒸肉餅(午)
家常嘅味道，厚厚嘅肉餅，肥瘦均勻，亦充滿肉味。鹹蛋就好似畫龍點睛噉樣點綴左成道菜。中秋節冇蛋黃月餅食唔緊要，原粒鹹蛋蒸肉餅都可以補償返！
⠀⠀⠀⠀⠀⠀⠀⠀⠀⠀⠀⠀⠀⠀⠀⠀⠀
第一名：黑椒汁雞髀煎蛋🍳(晚)
聽講間餐廳星期日唔開門嘅，我哋唔好理佢有冇請槍，最緊要好味。香濃嘅黑椒汁稠得嚟又唔會好辣；雞髀炸得啱啱好，唔太乾亦唔太油，加埋煎蛋，有喺中式扒房食鐵板餐嘅感覺，為一週私飯畫上圓滿句號。❤️
⠀⠀⠀⠀⠀⠀⠀⠀⠀⠀⠀⠀⠀⠀⠀⠀⠀
總結: 得頭三名叫見得吓人，其他都高油鹽，不過間唔中都好想食肉，所以隔1-2個月一次私飯好了，食得多好貴($2870/week) ，又唔健康。

manlinthanks