唔好意思！嚇親大家，雖然琴晚都知有機會被律政司要求收返旅遊證件，但今早突然有人上門都好突然。其實由2020年9月知道自己雖然表證不成立，律政司決定上訴，律師已同我講律政司有機會收返我嘅旅遊證件，避免我哋敗訴但人就走咗，所以當我仲選擇留喺香港，其實已有心理準備。

當初明知律政有機會再扣留我嘅證件，因為我太愛香港，亦有太多嘢未做完，加上家人都喺香港，所以一直隨遇而安做自己認為係正確嘅事。當琴晚知道同案另一位朋友，因為被查身份證而揭發我哋已在通輯拘捕名單，早已知道嚟緊會再傳召我哋上庭再申請保釋，只係無諗過佢咁急今朝早踩上嚟。似乎律政司擔心通輯名單通天，我會走佬，其實要走就一早走咗啦！雖然警察都非常有禮，但我阿媽真係被嚇親。連警察都奇怪，點解唔係法庭出信俾律師，等我哋早D做好準備，結果去到高等法院，連庭警都見唔到。

好多謝律師團隊幫我力爭取消保釋條件，雖然明知多數唔批，但無理由就咁放棄。律政司開出條件，要扣留旅遊證件，令我之後要外遊，外國讀書或外國交流，全部都要申請，仲唔知佢批唔批。呢個對於我呢D成年幾無走嘅人，律政司憑乜剝奪我嘅人生自由？我仲要每星期報到一次，令我嘅工作帶嚟麻煩。唔通我為咗就自己報到，唔去開組、見個案或攪活動？仲要今次唔知幾時排到期上訴，即代表未有上訴結果前，我嘅人生自由已嚴重受到影響，點會係少少不便呢？

當然，當日選擇唔走住，就預咗會咁，但我仍然會爭取應有權益，繼續如常生活，如常做我想做的事。今早打擾大家，千萬唔駛擔心我。🙇🏻‍♀️🙏🏻

陳虹秀