明年既今日，自己既另一宗暴動案都要開審，時過境遷，出咗來5個月，成個香港變咗好多，回望2020，2021，國安法既成立，12港人，初選大搜捕，數之不盡，喺裏面睇咁多新聞，面對日趨惡劣既政治環境，步步進逼既高壓強權，形勢嚴峻既民主運動，睇新聞都改變唔到任何野，可能只會令自己無力感越大，但又好想做啲野幫香港，亦都愛莫能助，相信唔少人都認同

喺認罪同不認罪之間，自己亦都深思熟慮，睇返細個到而家，不認罪係自己人生中做既最大一個抉擇，呢個抉擇係會放棄咗好多野，自己既親人，朋友，就學，就業機會，呢個抉擇亦都令我將會面對4年半甚至5年以上既牢獄生活，自己都會擔心，究竟自己將來入到去，會唔會被潛移默化，變咗質呢？雖然自己有好多顧慮和困擾，但作出不認罪既決定離唔開兩個字，信念

有啲人會話信念當飯食咩！面對現實la，浪子回頭金不換，早啲出返來投身社會，繼續學業，甚至移民去其他國家，開始另一段新既生活，自己亦都會諗，當初2019年遊行所嗌既口號「學生不是暴徒」，「我們沒有暴動」，係咪只係純粹係一個空泛既口號，嗌完就算？唔去付諸實行呢？

公安條例亦都係不合時宜，好多國家都已經廢除咗，就算有最高刑罰都唔會去到5年，10年，基本法27條所賦予香港人既言論，遊行，示威，集會自由，完全係同公安條例既條文格格不入，自相矛盾

雖然只係剩餘一年既時間，自己都唔奢望會有表證不成立，無罪釋放，唔理結果係點，好好運用呢一年既時間，搞好個page，專注學業，工作，活在當下

hksun_1204