19-6-2021 探監日常 by 金毛豬admin

今日又探富仔喇，佢心情好咗啲，冇再咁為案件煩惱了。今日問咗佢有冇嘢想同大家講，佢話都係老土嘢啦，好多謝大家支持佢哋，明白大家嘅心意，佢會盡量令自己充實啲🤣 開始冇咁負面㗎喇佢。

另外因為見到大家留言就問佢想睇咩書。佢竟然話想要教科書！！想要大學year 1嘅教科書，佢想自學下。

佢本身其實係讀會計嘅，但係佢同我講話唔想再讀Account啦。我自己覺得可惜嘅，因為其實之前返學Acc富仔測驗功課都好高分㗎…

不過唔緊要啦我覺得佢想學其他嘢係好事！可以令佢有更多時間放喺學業上面，唔再亂諗嘢。所以希望大家如果有咩year 1嘅教科書可以留低先！不過寫左嘢就唔得，懲教唔比入有寫過嘢嘅書。

佢叫我提大家記得留意下6/7嗰一堂案件。話到時佢哋上庭嘅時候大家一定會笑佢地🤣🤣大家可以到時再睇！不過唔包一定得㗎！係低B嘢而唔係犯法野大家可以放心。

今次附上我哋以前食糖水嘅相，我哋班朋友有個名㗎，叫「劣食糖水團」。因為我哋次次食嘅嘢都好難食，糖水都係…但係我哋同富仔約好咗㗎啦，話到時出返嚟一齊去食返以前食過最難食嘅雞煲同埋糖水🤣好期待嗰一日！佢仲話好驚食到嘔添🤣

*
*
*

請多多支持三粒星嘅Patreon
#save12hkyouths
#saamlapsing
#Threestars

https://www.patreon.com/saamlapsing

三粒星 Saam Lap Sing