探監日常 by金毛豬admin

今日又探左富仔，佢呢排真係唔係幾開心呀，無論係自己嘅事定係案件上面。都同佢傾咗好耐開解咗佢，雖然佢都未必聽得入耳嘅，就希望佢唔會亂諗嘢啦….

佢本身性格其實都係唔太樂觀，好多嘢諗嗰啲人嚟嘅，真係唯有多啲開解下。始終佢又係自己一個困（因為Cat A ，即係甲級犯，如罪成刑期10年+) 真係好易亂諗嘢嘅。

我同佢講返我哋Channel暫時嘅營運成果，佢都話覺得開心嘅因為真係知道有人係支持自己，會希望大家可以繼續支持佢哋咁樣。知道自己並唔係被拋棄嘅。話說早前入咗啲書俾佢睇，佢唔鍾意退返出嚟囉…揀飲擇食…🥲

講起日常嘢嘅時候諗返起我哋以前出去玩出去食嘢，出去打通宵機…佢話都唔知幾時可以有返呢啲生活，其實都好想再同我哋同大家一齊玩一齊開飯...坐緊監真係覺得好寂寞同好悶…

其實真係越聽越心悒。我又何嘗唔想呢，但係我哋而家可以做到嘅只有繼續支持，希望早日可以出返嚟。

牆內嘅手足無論係還押，泊正，其實都係冤獄，我哋目前冇任何辦法可以幫到…只能夠持續關注同支持，千祈唔好放棄佢哋任何一個。寫信又好，課金又好、幫手買物資又好、旁聽送車又好，做到嘅就盡做啦。

因為條友仔唔係幾鍾意收到啲陌生人嘅信，佢話唔知可以回乜好，所以如果大家想同佢交流下，可以留言，我會負責講俾佢聽，等佢知道原來仲有好多人支持佢！

附上喺網吧教人打機嘅富仔😂
*
*
*

請多多支持三粒星嘅Patreon
https://www.patreon.com/saamlapsing

#save12hkyouths
#saamlapsing
#Threestars

三粒星 Saam Lap Sing