今早8:10 到荔枝角收押所等候開門，和劉頴匡女友排隊探望阿匡，探完阿匡後再次排隊，探訪「和你飛」暴動案還押的邱文勁(椰子)。

一早等候人士眾多，一同等候探望收押親友。進入探訪室就見到岑子杰，我哋好開心見到面，互相飛吻😘佢隔住塊膠板大聲問我幾時去探佢🥰(等你哋快啲出嚟😘)

阿匡見到Emil 好雀躍，又update下每日情況。阿匡精神幾好，單獨囚禁好悶。佢好感謝陳日君樞機到臨探訪大家，得到平靜安慰。佢見樞機好操勞，都趁機會同佢講聲，保重身體。

有樞機講聖經，我就講下波經，講啲佢鍾意嘅足球消息。歐聯戰況、車路士喺杜曹帶領下不敗等～15分鐘好快過，我哋隔住塊膠板，互相擊掌，互撐對方🤚🏽完咗之後都見到胡志偉，佢都精神不俗。

之後再次排隊探邱文勁，等候時見到柯耀林親友探訪完，表示柯情況OK。進入探訪室時見到王百羽，亦向佢擊掌打氣🤚🏽💪🏼

椰子氣息都唔錯，係足球新聞唔靈通，唔知道愛隊嘅情況，我哋都有講吓英超現時走勢。佢喺入邊都有做運動，但着獄方提供嘅白飯魚，第二日會腳痛。佢話有啲物資唔夠，另外想睇厚啲嘅書，我哋會夾好安排入俾佢。

大家有書信想寫俾阿匡同埋椰子嘅話，歡迎交到辦事處，我哋安排寄出。另外亦要支持47位連同其他被告，加油撐住💪🏼

石威廉