《M仔還押公開信》

這次係我第一次寫公開信，希望藉此令牆外的人更認識、了解在囚手足的境況，亦盼望大家就算幾忙都好，都唔好唔記得每一位失去自由、犧牲自己的手足，「思念就係對死者最大的尊重」，我覺得依句說話同樣適合套用起依個情況下。

首先，M仔想起度多謝每一位旁聽師同送車師，當自己親身被困在囚車裡面，先至體會到原來旁聽同送車師係咁重要。猶記得第一次上庭，當裁判官拒絕保釋申請，當刻自己完全接受唔到，情緒崩潰，而起我極其絕望的時候，囚車開始駛離法庭，隨即見到好多的手足，又聽到大家叫「撐住啊！手足」「頂著啊！」「我地唔會唔記得你地架！」甚至有手足由法庭追到醫院（手足，請小心自己安全），多謝你地每一位，當時自己的淚水同鼻涕已經將整個口罩整濕。入到收押所，仍然好清楚記得嗰個畫面，亦都係靠你地的支持，我地先至挨到落去。起入面的生活雖然無想像中咁辛苦（雖然可能因為依家仲係還押），但係每日重覆一樣的生活，另一方面，對於將來的未知，初時情緒每日都好反覆，靠著大家的支持及鼓勵，先挨得到落去。而第二次提堂後離開嘅時候，法庭外有大量警員巡邏，但仍然有手足冒著咁大風險送車，多謝你地咁多位…但請…請注意自己的人身安全，我地絕對唔會希望見到你地599g或者被捕。

另外，面對著初選參選人因國安法而上庭，大部分都需要還押，相信大家都會失望、擔心，甚至驚，有依啲負面情緒是正常的，依啲情緒甚至可以幫助我地成長，令我地變得強壯。今日睇蘋果日報，有關緬甸的報道，「軍方坦言計劃是恐嚇人民和作拘捕，大部分人會因恐懼而回家，軍方就可重掌權力，人們將會習慣並如常過日子。而這策略在1988，2007及2008年均成功」。在此，我就不再作更多的分享同詮釋了。

（P.S. 4/3/2021夜晚我地起入面都聽到有人叫，雖然唔太清楚）

唔好放棄！記住我地！

Ｍ仔
5/3/2021