肥貓主人放學返嚟喇 Part II

《羅湖懲教所》第一夜

//喺囚車上睇住一班送車師喺馬路上面狂奔大叫我撐住，一定要食飯，天氣凍記得要著衫，嗰一刻真係因為感動而狂喊，除咗送車師，我印象最深刻仲有兩位旁聽師~一位揸住拐杖嘅伯伯同一位嬸嬸，呢一年幾而嚟，我差唔多每一次上庭佢哋都有嚟睇我，有時佢哋會走埋嚟同我講加油，有時會離遠對住我微笑點頭，無論係送車師抑或旁聽師，其實同我都非親非故，因為一埸「反送中」運動，我哋喺極權下好自然就咁connected。

我哋一個個好似被趕鴨仔咁帶落車入到「指模房」，一堆填form、登記、打指模、換衫、搜身、影監犯相、見值日官、分派物資等等程序之後，我就被分配去單獨嘅隔離囚室，因為我有喺大欖帶到個人嘅物品過嚟（書、洗頭水沐浴露，書信等）再加上呢度分派嘅一堆冬天衣物，所以我個箱特別重。

食完飯無幾耐，就有人嚟催我哋去沖涼，我哋成十個人被帶到浴室，呢度同之前喺大欖唔同，係完全冇間隔，好似沙灘戶外嗰啲沖身處咁，十個人要一齊冲涼，外面仲有一個人睇住，其他人好似覺得好平常咁，但係我覺得好尷尬，好唔習慣，我用呢生人最快嘅速度秒速洗完頭冲完涼著衫返出去等人帶我返自己囚室，我喺度諗之後幾個月係咪都要咁樣冲涼？點算好🥲

返到囚室望住三面牆，我覺得好攰，但係比起之前還押，反而心情係輕鬆咗，終於都唔使再擔心會判幾耐、提心吊膽咁，而家有一個日子我可以期盼、倒數住。一諗到咁我就急不及待咁拎紙筆寫信，我想即刻話比大家聽我嘅確實出册日期，唔想大家太擔心我。我一口氣寫滿咗4張紙，分別比我嘅家人，戰友同埋燒豬辦，因為要慳郵票，我每次寄信都係一次過寄4封出去等佢哋再幫我分派（因為每次最多只可以寄4張紙），而且每次大家收到我嘅信都會comment我啲字好細粒🤨大佬呀，慳紙慳郵票吖嘛，呢度入信封信紙都有限數㗎，每個星期只有一封免郵費可以寄，其他信要自己貼郵票，郵票要出糧買㗎，$2可以食到好多芝麻餅㗎喇🧐以我隔日寄一封信嘅速度會寄到我破產，好彩我帶咗20個郵票過界，但都要慳住用（還押期間每日有一個信封同4張信紙，可以寄一封免費，所以之前係日日寄，但係判咗之後一星期只有一次）

寫完信已經過咗十點，有姑娘經過提我要瞓覺喇，喺羅湖嘅第一晚，我竟然瞓咗比過去一年幾都要好嘅一覺......

P.S. 所有有關女監問題可留言，你問我答

#連儂說
#儂友
#肥貓主人
#在囚回憶錄//

儂友