“ ወደ ኢትዮጵያ ገበያ መግባት አስደሳች ነው " - ዲያን ካስተሊክ

የሳፋሪኮም፣ ቮዳኮም፣ ቮዳፎን፣ ሱሚቶሞ እና ሲዲሲ ጥምረት ልዑካንና የሳፋሪኮም ኢትዮጵያ አመራሮቻችን ከኢትዮጵያ ኮሚዩኒኬሽን ባለሥልጣን ዳይሬክተር ጀነራል ኢንጂነር ባልቻ ጋር ተወያይተዋል።

ከጥምረቱ አባላት አንዱ የሆነው የቮዳኮም ግሩፕ ዋና ሥራ አስኪያጅ ዲያን ካስተሊክ፣ ባለሥልጣን መስሪያቤቱ እስካሁን ላደረገው ያልተቋረጠ ድጋፍ እና መልካም ግንኙነት ምስጋና አቅርበዋል፡፡

ሚስተር ዲያን ፥ “ወደ ኢትዮጵያ ገበያ መግባት አስደሳች ነው፡፡ እንደ ቮዳኮም ሌሎች አገራት ያለንን ልምድ ማካፈል መቻላችንም ያስደስተናል፡፡ ቮዳኮም ለዲጂታል አካታችነት እና ለፋይናንስ አገልግሎቶች ከፍተኛ ትኩረት የሚሰጥ በመሆኑ በኢትዮጵያ ከቴሌኮም አቅርቦት በተጨማሪ ሌሎች እገዛዎችን ለማድረግ እንደሚሰራ ተስፋ አደርጋለሁ” ብለዋል።

ኢ/ር ባልቻ ሬባ የኢትዮጵያ ኮሙኒኬሽን ባለሥልጣን ለሳፋሪኮም ኢትዮጵያ ወደ አገር ውስጥ ለሥራ የሚያስፈልጉትን ቁሳቁስ በማስገባትና የባለድርሻ አካላት ግንኙነትን በማመቻቸት ሳፋሪኮም ጥራት ያለው የቴሌኮም አገልግሎት ማቅረብ እንዲችል እገዛ እንደሚያደርጉ አስታውቀዋል፡፡

የሳፋሪኮም የውጪ ጉዳዮች እና ሬጉላቶሪ ኃላፊ ማቲው ሃርቬ-ሃሪሰን፣ ድርጅታችን የፈቃድ ግዴታዎችን እና መመሪያዎችን በመከተል በተቻለው ፍጥነት የኔትዎርክ አቅርቦቱን ለማቀላጠፍ አፅንዖት ሰጥቶ እንደሚሰራ ተናግረዋል፡፡

ሚስተር ማቲው የኢትዮጵያ ኮሙኒኬሽን ባለሥልጣን በጉምሩክ እና ኢምፖርት ሂደቶች ለሳፋሪኮም ኢትዮጵያ የሚያደርገውን ድጋፍ አጠናክሮ እንዲቀጥል ጠይቀዋል፡፡

ውይይቱ ሳፋሪኮም ኢትዮጵያ የሚገኝበትን የዝግጅት ደረጃ እና በቀጣይ የሚሠሩ ሥራዎችን በመግለጽ ተጠናቋል፡፡

#ሳፋሪኮምኢትዮጵያ

@tikvahethiopia

' 07 ' 👉 የስልክ ቁጥር መለያ - #SafaricomETH

ቢዝነስ ዴይሊ ጋዜጣ ፥ ሳፋሪኮም ኢትዮጵያ በቅርብ ጊዜ ውስጥ በኢትዮጵያ ለሚጀምረው የሞባይል ስልክ አገልግሎት የስልክ ቁጥሮች መለያ ቁጥር 07 እንደሚሆን ማስታወቁን ዘግቧል።

እንደጋዜጣው ዘገባ ሳፋሪኮም በኬንያ ለሚሰጠው የሞባይል አገልግሎት የሚጠቀመው መለያ ቁጥር 07 ሲሆን አሁን ኢትዮ ቴሌኮም ከሚጠቀምበት መለያ ቁጥር 09. ቀጥሎ በሀገሪቱ ሁለተኛው ይሆናል።

ሳፋሪኮም ኢትዮጵያ በአሁን ሰዓት ኢትዮጵያውያን ሰራተኞችን እየቀጠረ ሲሆን ጥር ወር ላይ ብቻ 100 ሠራተኞችን እንደሚቀጥር አሳውቋል።

ምንጭ፦ https://www.businessdailyafrica.com/bd/corporate/companies/safaricom-set-use-07-prefix-ethiopia-phones-3655590

@tikvahethiopia

#Fagta

በረዶ ቀላቅሎ የጣለው ዝናብ በሰብል ላይ ከባድ ጉዳት አደረሰ።

በአዊ ብ/አስተዳደር በፋግታ ለኮማ ወረዳ በጋፈራ እና በዘበላ ግራይታ ቀበሌ በረዶ ቀላቅሎ የጣለው ዝናብ በመከር ሰብልና በመስኖ ሰብል ከባድ ጉዳት ማድረሱን ተጎጂ አርሶ አደሮች ተናግረዋል።

ጉዳት ከደረሰባቸው የመኸር ሰብሎች መካከል ጤፍ ፣ ስንዴ፣ አተር እና ገብስ እንዲሁም በመስኖ ድንች፣ የጓሮ አትክል ይገኙበታል።

የፋግታ ኮሙዩኒኬሽን ፥ የጉዳት መጠኑን በተመለከተ ተጣርቶ በቀጣይ እንደሚገልፅ አሳውቋል።

@tikvahethiopia

" የአሜሪካ ጦር በስህተት በጣላቸው ቦንቦች ብቻ ከ1 ሺ 300 በላይ ንጹሃን ሰዎች ተገድለዋል " - ሰነድ

አሜሪካ በመካከለኛው ምስራቅ ባካሄደቻቸው የአየር ድብደባዎች ላይ የፈፀመችውን ስህተት የሚያሳይ ሰነድ ይፋ ሆኗል።

በቅርቡ ከአሜሪካው መከላከያ መስሪያ ቤት ፔንታጎን እንደወጣ የተነገረው ሰነድ አሜሪካ በመካከለኛው ምስራቅ ሀገራት ባካሄደቻቸው የአየር ድብደባዎች በርካታ ንጹሃን ዜጎች መገደላቸውን የሚያመላክት ነው።

በስህተት ተፈጽመዋል በተባሉት የአየር ድብደባዎቹም ህይወታቸው ካለፈ ንጹሃን ዜጎች መካከል በርካታ ህጻናት እንደሚገኙበት ተመላክቷል።

በሰነድ ላይ መካከለኛው ምስራቅ የተፈፀሙ አብዛኞች የአየር ድብደባዎች ከወታደራዊ ደህንነት እውቀት ውጪ የተፈፀሙ ናቸው ተብሏል።

በቅርቡ የተሰበሰቡ ተዓማኒ ሰነዶች እንደሚያመላክቱት የአሜሪካ ጦር በስህተት በጣላቸው ቦንቦች ብቻ ከ1 ሺህ 300 በላይ ንጹሃን ሰዎች እንደተገደሉ ያመላክታል።

ከዚህ ጋር በተያያዘ ግልፀኝነትን ተጠያቂነትን ከማስፈር አንጻር እስካሁን በግልጽ የተሰራ ስራ አለመኖሩ / ለተፈፀሙ ስህተቶች አስካሁን ተጠያቂ የተደረገ አካል እንደሌለ ተገልጿል።

በሰነዱ ላይ የአሜሪካ ልዩ ኃይል እ.ኤ.አ. በሐምሌ ወር 2016 ላይ በሶሪያ የፈፀመው የአየር ድብደባ ለአብነት ተቀምጧል።

በዚህም የአሜሪካ ልዩ ኃይል በሶሪያ የአሸባሪው ISIS የተጠቀምበታል ተብሎ የታመነ ሶስት ስፍራዎች ላይ በተፈፀመ የአየር ጥቃት ከ120 በላይ አርሶ አደሮች እና የገጠራማ አካባ ነዋሪዎች መገደላቸው ተመላክቷል።

መረጃውን ኒው ዮርክ ታይምስ የተባለው የአሜሪካ ጋዜጣ ነው ይዞት የወጣው።

ምንጭ፦ አል ዓይን ኒውስ

@tikvahethiopia

" ከህወሃት ጋር ምንም አይነት ግንኙነትም፣ ንግግርም፣ ድርድርም አንፈልግም "- አቶ ሙሳ አደም

የአፋር ህዝብ ፓርቲ ከህወሃት ጋር ምንም አይነት ንግግርና ድርድር ማድረግ እንደማይፈልግ አስታወቀ።

የፓርቲው ሊቀ መንበር አቶ ሙሳ አደም ለአል ዐይን በሰጡት ቃል፤ አሁን ላይ በሕዝብ ላይ ትንኮሳና ጥቃት እያደረሰ ካለው የህወሃት ቡድን ጋር እንደ ፓርቲ መነጋገርም ሆነ መደራደር እንደማይፈልጉ ገልፀዋል።

አቶ ሙሳ ህወሃት ትናንትና ከሰዓት በኋላ በሰሜን አፋር በኩል አዲስ ጥቃት መክፈቱን ተናግረዋል።

ህወሓት በመጀመሪያ በአፋር ክልል በራህሌ ጥቃት ሰንዝሮ እንደነበር አስታውሰዋል።

አቶ ሙሳ፥ ህወሃት የአብአላ ከተማን ለመቆጣጠር 3 እና 4 ጊዜ ሙከራ ማድረጉን ገልጸው በአካባቢው ያለው የአፋር ሕዝባዊ ሰራዊት ይህንን ጥቃት እየመከተ መሆኑንም ተናግረዋል።

የአፋር ሕዝብ ፓርቲ ከስር መሰረቱ የተቋቋመው ህወሃት በሕዝብ ላይ ሲፈጽመው የነበረውን የረጅም ዘመናት ግፍና መከራን ለመታገል ነው ያሉት አቶ ሙሳ ፓርቲያቸው ከሕወሃት ጋር ምንም አይነት ግንኑነትም፣ ንግግርም፣ድርድርም እንደማይፈልግ ተናግረዋል።

አቶ ሙሳ፤ እንደፓርቲ ከህወሃት ጋር ድሮም ምንም ንግግር አልነበረንም ያሉ ሲሆን፤ ወደፊትም ንግግር ሊኖር አይችልም ሲሉ ገልጸዋል።

ሊቀመንበሩ፥ “ህወሃት የአፋርን ሕዝብ ብዙ መከራ አብልቷል” ያሉ ሲሆን የፓርቲውን አመራሮች አሸባሪ ብሎ ፈርጆ እንደነበር አስታውሰዋል።

እንደፓርቲ ከህወሃት ጋር መነጋገር እንደማይፈልጉ የተናገሩት አቶ ሙሳ እንደሀገር ግን የኢትዮጵያ ሕዝብ ተነጋግሮ ችግሮቹን በጠረንጴዛ ዙሪያ መፍታት ከቻለ “እኛም እንደ አንድ የኢትዮጵያ ክፍል ሰላም የምናገኝበት አጋጣሚ ሊኖር ስለሚችል የኢትዮጵያ ሕዝብ የሚወስነውን አብረን የምንወስን ይሆናል” ብለዋል።

#አልዓይን

@tikvahethiopia

10 ጀማሪ የቴክኖሎጂ ድርጅቶች ተመረቁ።

ባሳለፍነው ሳምንት ኦርቢት የኢኖቬሽን ማጎልበቻ ማዕከል (OIH) ከማስተር ካርድ ፋውንዴሽን ጋር በመሆን 10 አዳዲስ ጀማሪ የቴክኖሎጂ ድርጅቶችን አስመርቋል።

የተመረቁት ጀማሪ የቴክኖሎጂ ድርጅቶቹ በጤና፣ በትምህርትና አገልግሎት ዘርፍ ያሉ ችግሮችን የቴክኖሎጂ መፍትሄ መስጠት ላይ ትኩረት ያደረጉ ናቸው።

ኦርቢት የኢኖቬሽን ማጎልበቻ ማዕከል አዳዲስ ጀማሪ ድርጅቶችን ሲያስመርቅ ይህ ለሁለተኛ ጊዜ ሲሆን ከዚህ ቀደም 5 ድርጅቶችን አስመርቋል።

እንዴት ነው ድርጅቶቹ የሚመረጡት ?

- ለአንድ ወር በማህበራዊ ሚዲያዎች ላይ ዘመቻ ይካሄዳል ፤ ጥሪ ይቀርባል።
- ጥሪውን ተከትሎ የሚያመለክቱ ጀማሪ ድርጅቶች ይጠራሉ።
- የተወሰነ ቁጥር ተመርጠው የሶስት ቀን ስልጠና ይሰጣቸዋል።
- ከስልጠናው በኃላ በሚያቀርቡት ፕረዘንቴሽን እንዲሁም አዋጭነታቸው እና ችግርን የማፍታት አቅማቸው ተገግምግሞ የተመረጡ ወደ 4 ወር ስልጠና ይገባሉ።
- የ4 ወሩ ስልጠና ብራንዲንግ፣ ማርኬቲንግ ስትራቴጂ ፣ ቢዝነስ ስትራቴጂ ... ሌሎችም ጉዳዮች ላይ ጥልቅ እውቀት እንዲያገኙ ይደረጋል።
- ከስጠናው በኃላ ከማስተር ካርድ ፋውንዴሽን የተገኘው የገንዘብ ድጋፍ ይሰጣቸዋል።
- በመጨረሻም የኢንቬስተሮች ጋር የሚገናኙበት መድረክ ይመቻችላቸዋል።

እስካሁን 15 ጀማሪ ድርጅት ከአዲስ አበባ የወጡ ሲሆን በቀጣይ ስራውን በስፋት ከአዲስ አበባ ውጭ ባሉ እንደ ጎንደር፣ ባህርዳር ፣አዳማ፣ ሀዋሳ፣ ደሴ በመሳሰሉ ከተሞች ለማስፋት እየተሰራ መሆኑን ኦርቢት የኢኖቬሽን አሳውቆናል።

* ባለፈው ሳምንት ስለተመረቁት ጀማሪ ድርጅቶች ዝርዝር መግለጫ ከላይ ተያይዟል።

@tikvahethiopia