" የሚመጡ እንግዶችን ደህንነት ለመጠበቅ ዝግጅት ተጠናቋል " - ፌዴራል ፖሊስ

በ "አንድ ሚሊዮን ዳያስፖራ ወደ ሀገር ቤት " ጥሪ መሰረት ወደ ኢትዮጵያ የሚመጡ እንግዶችንን ደህንነት ለመጠበቅ የሚያስችል አስፈላጊው ሁሉ ዝግጅት መጠናቀቁን የኢትዮጵያ ፌዴራል ፖሊስ ኮሚሽን አስታውቋል።

ፌዴራል ፖሊስ በአዲስ አበባ ከተማ ሆነ በሌሎች የአገሪቱ አካባቢዎች የሚመጡ እንግዶችን ደህንነት ለመጠበቅ የሚያስችል ዝግጅት አስቀድሞ ማድረጉን ገልጿል።

የጸጥታና ደህንነት ተግባሩን የኮማንድ ፖስቱ የጸጥታ መዋቅር ከህብረተሰቡ ጋር በመሆን የሚያከናውን ሲሆን ጥምር የጸጥታ ሃይሎች አስቀድሞ የጸጥታ ስጋት የሆኑ ነገሮችን በመለየት እንግዶቹ በሚንቀሳቀሱበት ስፍራ ምንም አይነት ችግር እንዳይገጥማቸው በቂ ዝግጅት ማድረጋቸውን ፖሊስ አሳውቋል።

እንግዶቹ ለሚያጋጥማቸው ማንኛውንም ነገር መረጃ ለመስጠትና አስቀድሞ መረጃ ለማግኘት የሚችሉባቸውን አድራሻዎች ከፌደራል ፖሊስና ከአዲስ አበባ ፖሊስ ማህበራዊ ገጾች ማግኘት ይችላሉ።

እንግዶች በስፋት ወደ ሀገር ሲገቡ ደግሞ አድራሻዎቹን የማሳወቅ ስራ እንደሚሰራ የኢትዮጵያ ፌዴራል ፖሊስ መግለፁን ኢዜአ ዘግቧል።

@tikvahethiopia

Turkey 🤝 Africa

የቱርኩ ፕሬዜዳንት ሪሲፕ ጣይብ ኤርዶጋን እና የሱማሊያው ፕሬዜዳንት ሞሀመድ አብድላሂ ፈርማጆ ወይይት አካሄዱ።

3ኛው የቱርክ-አፍሪካ ትብብር ጉባኤ በኢስታንቡል እየተካሄደ ይገኛል።

ከጉባኤው ጎን ለጎን የቱርክ እና የሱማሊያ መሪዎች ተገነኝተው ውይይት እንዳደረጉ ተሰምቷል፤ የውይይቱን ይዘት በተመለከተ የተባለ ነገር የለም።

@tikvahethiopia

#Update

ጠ/ሚ ዶ/ር ዐቢይ ከፕሬዜዳንት ኤርዶጋን ጋር ተወያዩ።

ከቱርክና አፍሪካ የመሪዎች ጉባኤ ጎን ለጎን፣ ጠ/ሚ ዶ/ር ዐቢይ አህመድና የልዑካን ቡድናቸው ከፕሬዝዳንት ኤርዶጋን ጋር የሁለትዮሽ ውይይት ዛሬ አካሂደዋል።

ዶ/ር ዐቢይ ፥ " የሁለቱ ሀገራት ታሪካዊ ግንኙነት ሁሌም በመከባበር ላይ የተመሠረተ ነው። ትብብራችን በገንቢ ተሳትፎ ላይ በመመሥረት ተጠናክሮ ይቀጥላል " ብለዋል።

@tikvahethiopia

#UN_Human_Rights_Council

ለተመድ የሰብዓዊ መብቶች ምክር ቤት የቀረበው የውሳኔ ሃሳብ ጸድቋል።

በአውሮፓ ህብረት ጠያቂነት የቀረበው የውሳኔ ሃሳብ ዛሬ በተካሄደው ልዩ ስብሰባ ነው የፀደቀው።

የውሳኔ ሃሳቡ በ21 ድጋፍ እና በ15 ተቃውሞ የጸደቀ ሲሆን 11 ሃገራት ድምጽ ከመስጠት ታቅበዋል።

ለተመድ የሰብዓዊ መብቶች ምክር ቤት የቀረበው ረቂቅ የውሳኔ ሃሳብ ምን ይዟል ?

በአውሮፓ ህብረት አማካኝነት ቀርቦ የፀደቀው የውሳኔ ሀሳብ በሰሜን ኢትዮጵያ የተፈፀሙ ሰብዓዊ መብት ጥሰቶችን የሚመረምር ዓለም አቀፍ ባለሞያዎች ቡድን በኢትዮጵያ እንዲሰማራ የሚጠይቅ ነው።

የውሳኔ ሀሳቡ ከዚህ ቀደም የኢትዮጵያ ሰብዓዊ መብቶች ኮሚሽን ከተመድ ሰብዓዊ መብቶች ምክር ቤት ጋር በጥምረት ያደረጉት ምርመራ ውጤት መነሻ አድርጎ ተጨማሪ ምርመራ የሚያደርግ ዓለም አቀፍ የባለሙያዎች ቡድን እንዲሰማራ የሚጠይቅ ነው።

ዓለም አቀፍ መርማሪ ቡድኑ በኢትዮጵያ የአንድ ዓመት ቆይታ እንዲኖረው የሚጠይቅ ሲሆን የሚላከው ቡድን ከሚያደርገው ምርመራ በተጨማሪ ፦
- የሽግግር ፍትህ ተግባራዊ የሚያደርግበትን፣
- ዕርቅና ተጠያቂነት የሚሰፍንበት
- ሰብዓዊ መብት ጥሰት የደረሰባቸው ማገገም እንዲችሉ ምክረ ሃሳብና የቴክኒክ ድጋፍ የመስጠት ኃላፊነት እንዲኖረው ይጠይቃል።

@tikvahethiopia

" የተላለፈውን ውሳኔ አትቀበልም፤ አታስፈፅምም፤ የትኛውንም አይነት ትብብር አታደርግም " - ኢትዮጵያ

የውጪ ጉዳይ ሚኒስቴር የተመድ የሰብአዊ መብቶች ምክር ቤት በኢትዮጵያ ዙሪያ ያካሄደውን ልዩ ስብሰባና በምክር ቤቱ የጸደቀውን የውሳኔ ሀሳብ አስመልክቶ መግለጫ አውጥቷል።

በመግለጫው፥ ኢትዮጵያ ም/ ቤቱ አንዳንድ አገራት የፖለቲካ አጀንዳ ማስፈጸሚያና መጠቀሚያ መሆኑ እጅጉን እንዳሳዘናት ገልጿል።

የኢትዮጵያ መንግስት የም/ቤቱ ልዩ ስብሰባ እንዳይካሄድ ሲገልጽና ሲቃወም የነበረ ቢሆን ይሄንን ችላ በማለት ስብሰባው መካሄዱን አመልክቷል።

ስብስባው ምክር ቤቱ ያጸደቀውን የተባበሩት መንግስታት ድርጅት የሰብአዊ መብቶች ከፍተኛ ኮሚሽነር ቢሮና የኢትዮጵያ ሰብአዊ መብቶች ኮሚሽን የጋራ ሪፖርት ግኝት ያላከበረና የናቀ መሆኑን አስታውቋል።

የተመድ የሰብአዊ መብቶች ም/ቤት በኢትዮጵያ ዙሪያ ያካሄደውን ልዩ ስብሰባ የኢትዮጵያ ሉዓላዊነት፣ የግዛት አንድነትና ነጻነት የሚገዳደር ነው ብሏል።

ኢትዮጵያም ያለ ፍላጎቷና ፈቃዷ በተደረገው ልዩ ስብሰባ የተላለፈውን ውሳኔ እንደማትቀበል፣ እንደማትፈጽምና የትኛውንም አይነት ትብብር እንደማታደርግ አሳውቋል።

ኢትዮጵያ ከብሔራዊ ጥቅሟና ፍላጎቷ ውጪ የፖለቲካ ፍላጎታቸውን ለመጫን የሚከናወኑ ማንኛውም ድርጊቶችን እንደማትቀበል አስገንዝቧል።

በሰብአዊ መብት ስም በአገራት ላይ የሚደረግ ጣልቃ ገብነትና ፖለቲካዊ ጫና ሊቆም ይገባል ብሏል።

በእውነትና መርህ ላይ ተመስርተው ልዩ ስብሰባውንና የውሳኔ ሀሳቡን በመቃወም ከኢትዮጵያ ጎን በመቆም አጋርነታቸውን ላሳዩ አገራት ምስጋና አቅርባለች።

ኢትዮጵያ በዓለም አቀፍ ሕግ የዜጎች ሰብአዊ መብቶች እንዲጠበቁና እንዲከበሩ ያሉባትን ግዴታዎች ለመወጣት አሁንም በቁርጠኝነት እንደምትሰራ ሚኒስቴሩ አስታውቋል።

@tikvahethiopia

#UPDATE

የመንግስት ኮሚኒኬሽን፥ " በላሊበላና በሙጃ መካከል ሾልኮ ገብቶ ጋሸናን ለመቁረጥ ሲሞክር የነበረው የጠላት ኃይል በጀግናው የወገን ጦር ከበባ ውስጥ እንዲገባና እንዲደመሰስ በማድረግ - የኀሙሲት ፣
- እስታይሽ፣
- አሁን ተገኝ፣
- ድልብ፣
- ኩል መስክ እና አካባቢያቸው ሙሉ በሙሉ ከጠላት ነጻ " ወጥተዋል ሲል አሳውቋል።

" በአሁኑ ሰዓት ጀግናው የወገን ጦር የላሊበላ አካባቢን ከጠላት በማጽዳት፣ በሰቆጣ ከተማና በዙሪያው ባሉ አካባቢዎች የመሸገውን የጠላት ኃይል እየደመሰሰ ይገኛል ፤ እግሬ አውጭኝ ብሎ ወደ ኮረም አቅጣጫ እየፈረጠጠ ያለውን ጠላት እግር በእግር እየተከተለ ሙት፣ ቀስለኛና ምርኮኛ በማድረግ ላይ ነው " ሲልም ገልጿል።

@tikvahethiopia