食環執法爆衝突被兇片段瘋傳 惡漢粗口怒罵：咁多垃圾唔清？
2男涉襲擊判社服令

食環署人員早前喺北角春秧街就店舖阻街執法期間，遭2名男子襲擊。網上近日流傳雙方「打大交」片段，初時見一名男子疑搶奪被充公貨物後，即被10多名食環署人員包圍，後來一名赤裸上身嘅大漢介入，又不停用粗口指罵人員，「你老母臭X！咁多垃圾唔清？清你老母呀！」雙方爭執持續至少6分鐘，有食環人員其間報警，涉嫌襲擊嘅2名男子噚日（2日）就被判咗社會服務令80小時。

案發係今年6月29日，網上流傳嘅片段長超過6分鐘，片中可見一名黑衫男子疑搶返被充公嘅水果後，即被食環署人員喝停：「放手！唔好玩嘢呀！」其間更一度有10多名食環署人員上前「增援」，將男子包圍，雙方互相推撞，情況混亂。一名赤裸上身嘅大漢亦加入「戰團」，欲拉開食環署人員，令場面更添混亂，黑衣男子嘅T恤亦被扯爛。

在旁嘅一名食環女職員大叫「停手！冷靜啲！」一名人員則表示報警，「有衝突！」雙方嘅肢體衝突終於暫停，但赤裸大漢同黑衣男子等人仍不停以粗口指罵食環人員，「你老母臭X！咁多垃圾唔清？清你老母呀！」、「仆街！X你老母！嚇鬼呀？」、「頭先邊個打我背脊？出嚟吖！」、「幾多號冧巴！」、「咁Ｌ大權利呀？」、「呢啲叫執法咩？」食環署一班人員被粗口辱罵期間，都企定定喺度，未有阻止，另有人員在外圍拍片。

後來一名食環署人員欲平息事件，但惡漢未有聽勸喻，繼續勞氣咁話「大聲唔代表無禮貌」、「拉我喎？」雙方又再幾乎再爆口角衝突。爭執持續至少6分鐘，都未見有警員蹤影，搞到食環署人員追call添！最後片尾聽到警車聲響，但冇交代點收場。

而涉嫌襲擊嘅2名男子，其中一名被告被裁定妨礙公職人員執行職務及普通襲擊罪成，另一名被告就被裁定妨礙公職人員執行職務罪成，噚日喺東區裁判法院分別被判80小時社會服務令。食環署人員喺今次執法行動中亦一共充公約73公斤貨物。

#channelchk #店舖阻街 #阻街 #食環署 #春秧街 #襲擊