▌根據由1000部收視記錄儀得出嘅數據，#TVB (AKA #老人台)上周收視仍然唔樂觀，兩套劇集仍未突破20點收視，首播嘅《愛上我的衰神》嘅成績比《拳王》更差，至於綜藝收視則仍然處於10-11點水平，比起早兩個月低出2-3點，《東張西望》同《愛回家》繼續係TVB嘅救命稻草。

▌台慶月過後，TVB推出兩套疑似「渲染怪力亂神」嘅奇幻劇集，分別係《#異搜店》同《#愛上我的衰神》。《異搜店》由何廣沛、陳曉華主演，並由一眾愛国綠葉演員扶持，包括曹永廉、李成昌、黎燕珊、楊玉梅等，上個禮拜收視為19.7點，拍得住台慶劇水平。至於由胡鴻鈞、陳嘉慧主演嘅《衰神》則比較遜色，首週收視僅得15.9點，成績仲差過上套《拳王》，加入十大低收視劇集毫無懸念。兩套劇集加埋只有三個贊助，包括大家見慣見熟嘅 #馬百良、#海馬牌 及 #象牙世家。

▌綜藝時段由直播帶貨節目《#識貨2》填補《麻雀鬥室三決一》嘅空缺，雖然收視只得9.9點，但相信 #王祖藍 並唔志在嗰幾點收視落差，原因如下：

1️⃣ 呢個節目可以𢯎到贊助商，分別有 #髮再生、#屈臣氏寵物藥妝、#健絡通、#張公館、華潤 #怡寶 贊助，對比其他綜藝節目，呢度算係好多贊助；

2️⃣ TVB可以借機推廣大家上自家嘅Big Big Shop、士多、鄰住買購物，發展電商業務，補貼電視業務嘅虧損；

3️⃣ 王祖藍俾人邀請返TVB都係因為佢識帶貨、熟悉中国行情啫，梗係要搞返啲「中国式節目」嚟履行使命喇，如果培訓到藝人嘅「帶貨技能」又推到佢北上搵食，TVB就大把油水可以抽；

4️⃣ TVB雖然係香港嘅電視台，但中国、馬來西亞先係班高層嘅目標客群，佢哋唔需要取悅香港觀眾，只需要喺中国、馬拉市場分取杯羹，如果大家細心留意，就會發現TVB廣告客戶都開始喺廣告附上淘寶、天貓圖樣，大家明喇。

▌最後講吓TVB廣告狀況，近期絕大部份都係自家節目、政府宣傳、保健及藥品、家用品、借貸公司廣告，偶爾都會有啲新廣告商出現，畢竟慣性觀眾多，對企業有一定吸引力，但認真唔多，廣告期亦未必長。另外，農曆新年將至，根據「傳統」，相信會有極大量公司貪平、貪過癮落賀年廣告，不過呢個現象唔會維持好耐，大家都可以留意吓嘅。

▌之前講過「禁堂食令」谷起咗 #TVB (AKA #老人台) 收視，原本徘徊喺16-20點收視水平嘅劇集都大幅躍升，根據1000部收視記錄儀得出嘅數據，《#鐵拳英雄》同《#異搜店》嘅 #電視直播收視 為20.9點及25.5點。其實公佈電視直播收視呢個做法就用咗半年有多，不過懷疑有人嫌收視仲係太低，喺報告上特別標注埋 #七天跨平台直播收視 平均有21.7點，即係將電話電腦睇直播嘅數加埋入去，點知過多兩日，TVB嘅友好媒體《星島日報》直頭用埋 #七天跨平台總收視，再將七日內重溫節目嘅數字加埋入去，推到個收視上24.8點，睇漏兩眼都以為套劇真係咁收得。

▌至於另一套劇集《異搜店》，原本頭兩個禮拜電視直播收視都唔過20點，之後適逢政府宣佈「禁堂食令」，令其收視喺第三、四週躍升至22.3點及25.5點，而有人亦特別強調 #大結局嗰集嘅跨平台直播收視 高達28點，跟住男主女角再喺《東張西望》慶祝，玩數字玩到出神入化，期待日後加入「加權收視」、「大灣區跨平台總收視」、「七天跨物種跨平台總收視」，以完善收視計算制度。

▌另外，《鐵拳英雄》演員（冇 #王君馨）喺出席宣傳活動時，竟然搵啲女演員坐爆、踢爆男演員大髀中間嘅汽球，以 #曾志偉 及 #查小欣 嘅道德標準而言，畫面同意識都極度不良(見LINK)，希望你哋「#唔好教壞細路」，多謝。

https://www.instagram.com/p/CY59T2SPjlR/