踏入「台慶月」，無綫開始推出 #台慶劇 《#星空下的仁醫》、《#換命真相》催谷收視，但好可惜根據1000部收視紀錄儀得出嘅數據，《仁醫》同《換命》只係分別取得18.5點及19.1點收視，同之前兩套非台慶劇相若，成績仍然差過20.7點嘅《#愛回家》。

《#及時雨信貸 呈獻：星空下的仁醫》[1]係一套醫療劇，可能因為請到鄭嘉穎、鍾嘉欣、周家怡等藝人回巢[2][3][4]，所以自上年起已經經常被娛樂新聞報導，加埋馬國明、羅子溢助陣，收視低開實在令人驚喜。不過，由於該劇喺中国豆瓣取得9分評分，所以TVB嘅友好傳媒《香港01》仍然睇好該劇，形容「收視首周蘊釀蓄勢待發」。

至於《#象牙世家 呈獻：換命真相》則係由譚俊彥、鄧佩儀主演嘅穿越劇，由於小編掛住留意譚俊彥另一套劇《魷魚遊戲》，所以除咗叫大家愛護環境，保護大象之外都無咩補充。

最後，呢兩套劇都唔覺有植入式廣告。

——————————
[1]綜合壹傳媒及《東網》資料，及時雨信貸由黃桂芬、黃桂榮等人創辦，其家族曾涉及串謀詐騙、刑事恐嚇等多項罪名，多次被港深警方拘捕。
[2]鄭嘉穎於2016年TVB約滿，今次被重金邀請回巢拍劇。
[3]鍾嘉欣自2018年TVB約滿後，首次回巢拍劇，據《星島》傳聞，其片酬達30萬一集。
[4]周家怡目前為英皇藝人，會於TVB、ViuTV游走拍攝節目。