#手足投稿
呢一首歌，係獻俾每一位擁有「良知」呢樣缺陷嘅人

可能嚟緊2021年，香港就會受到中共嘅全面打壓：言論自由、記者四權、真話真相都可以俾中共降罪

可能望返轉，當初喺街頭流嘅汗水，眼淚同血都好似白流咗一樣。望住宜家嘅香港同每日發生嘅事，大家都有好多唔同嘅思緒；但人無完人，已經做咗、已經發生咗嘅事情冇得重頭來過，我地只能夠承受結果。

係，良知真係一樣好蠢嘅野，良知會令我買一支洗頭水都可以用十分鐘去查個牌子。更蠢嘅係好多手足因為良知付出咗佢地嘅未來甚至係生命。但正正係良知，我地先可以稱得上係一個人；正正係良知，我地每一位可能名甚至樣都唔知嘅陌生人，成為左一個個嘅手足。

可能呢一刻，你已經好攰好想放棄，唔再睇落去，甚至開始安排離開香港；又或者你可能係被清算中嘅手足，開始無路可逃，但我相信每一件事情，都有佢嘅意義係度。可能咁樣講會好唔負責任，但每一件事情落決定果一刻，你只能盡力去做，無人知道條路會通往邊一度。只要你對你嘅人生，你嘅良知負責就可以了。我只有希望你望返轉頭，唔好對你嘅人生後悔。

希望大家無論去到邊一度，發生咩野事情都好，都繼續懷有良知、懷有信念。因為香港人，並唔係單單只係居住係呢片土地，而係一切經歷過嘅事同價值觀令我地成為香港人。

希望大家可以有一日係夢中相見，係煲底再見。

即使香港可能未必有下一歲。

無論去到邊，手足，大家都係手足。

https://youtu.be/GDYRoLDyRWU


#讀者投稿
2020年11月24日

✉️ 文宣戰最前線 @mansuenfrontliners
✉️ 文宣、連儂作品投稿 @msfllennon_bot