七師傅接Job冇停手 化身「七師虎」拍超市賀年廣告

七仙羽「七師傅」過去呢一年人氣急升，早排先做完張敬軒演唱會嘉賓，而家又變身「七師虎」，拍超級市場嘅農曆新年廣告，打斷過去大台藝人壟斷嘅場面。數落今年七師傅都已經拍咗起碼40個廣告，支付寶、屈臣氏、豐澤、譚仔、惠康、戶戶送deliveroo都會見到佢嘅蹤影，十分架勢。

七師傅一向語出驚人，今次拍廣告都唔例外，又話「做戲做全套」要加毛毛老虎耳仔同埋手爪，想做一隻「有活力少女感覺」嘅「七師虎」，所以就要有道具加持，仲跳埋「七字舞」。

睇嚟廣告團隊都好鍾意食字gag，連七師傅金句「師傅愛你」，喺揮春上面都改為「師虎愛你」，Channel絲期待呢個廣告會被投稿到食字gag嘅IG Page。

#channelchk #七師傅 #七仙羽