⭐️ 7 мая - ы'лён радио

🎙Ынаныттъычакэн кэлиткуплыткульын пыӈылгэчельо Чукоткакэн Татьянана Ачиргина нэнакэтъоӄэн, иӈӄун мурыгнутэк гапыӈылтэлымголенат лыгъоравэтльаелымэл ынкъам айванальыелымэл вэтгавъёлгэпы Россиен патляӈ телевещанияйпы ЧГТРК «Чукотка» (игыт ГТРК «Чукотка»), еп 1966й гэвэтагнэты. Ытлён гэкэлиткуплыткулин ынӄэнагэвэк пыӈылгычельо Уральский государственный эквыкалеткорак городык Свердловск.

➡️Ынӄэнагэвэткок вэтгавъёлгэпы гапыӈылтэлленат Зоя Ненлюмкина, Владимир Кальачайвыгыргын, Яков Кымъыет ынкъам Александ Тӈагыргын.

Наӄам ӄмэк ымыльо вэтгавыт пыӈылтэлыльа гэнлелинэт прямой эфиргыпы. Ӄырым ытръэч эмтэминӈэ, ӄэльуӄ-ым уйӈэ авэтгавкалеяанаӈака. Наӄам мыгпыӈылтэлльэн мигчиртэнмычьын гатвален вэтгавъёлгымэгчетльэн.

⭐️Нымкыӄинэт о’равэтльат лыги палёмтэлыльа амноӈгыпы ынкъам нымнымыткойпы мурыгнутэкин. Ынӄэн Анатолий Сальыко, Свектлана Тагъёӄ, Нина Энмынкау, Антонина Вербицкая, Евгения Тыӈэру, Маргарита Беличенко, Зинаида Кэвэв, Михаил Зеленский, Лариса Выквырагтыгыргыӈа, Евгений Кучин, Надежда Кучина, Елена Тимонина…

Гамганымнымык гъатчаленат титэ рамгоӈыт пыӈылтэлык. Наӄам лыгинымкыӄинэт кэливытгырти энанымӈылявкэнат гатваленат – ымы культуракэнат, инэныгйивэткинэт, энанчечьаваткэнат, политикакэнат, торпыӈылкэнат ынкъам вэтгавволгырепортажтэ мурыгнутэкин вагыргыгъет.
Таӈымыльо ныйгулӄинэт мигчирэтык ымы телевиденияйпы ымы вэтгавъёлгэпы.

Игыр-ым авыннымытвальэн пыӈылгэчельо нымигчирэтӄминэт Наталья Радунович, Лариса Выквырагтыгыргыӈа, Галина Пэӈэлӄут, Тамара Ӄоравье.
Ӈыръо гапаролма гивит яалегты вэтгавъёлгык «Выял», ръэнут нымигчирэтӄин FM диапазонак, гамголенат пыӈылтэлык лыгъоравэтльаелымэл ыннанычьэпы кнаъм ыннанмытлыӈычьэпы Анна Гыргольгыргыӈа ынкъам Нина Пэӈэлӄут.

✍️Анна Гыргольгыргыӈа
#Чукотка #АКМНЧ