號召為食貓！餐廳單日僅做50蚊營業額：
一個鐘人工都畀唔起 籲多支持小店

政府早前宣佈禁晚市堂食等防疫措施延長至農曆年初三（2月4日）後，好多食肆都推出外賣優惠吸客，甚至搞代購，希望捱得一日得一日。不過，距離屆滿日仲有兩個星期，已有唔少餐廳都就撐唔住，亦有餐廳宣佈將忍痛結業。呢兩年受疫情影響，大家都好難捱，但希望大家都可以支持吓佢哋，一齊度過難關。

尖沙嘴Untitled Cafe & Bar噚晚喺facebook發帖，「原本唔想賣慘，畢竟做生意有賺有蝕，但係今日真係好想同大家報告下今日營業額，係一杯咖啡嘅價錢，50蚊連手足一個鐘人工都畀唔起。」雖然經營困難，但店主都希望呢個時間，大家都多啲支持小店。佢哋亦推出了外賣咖啡半價優惠，大家去開尖嘴亦可以幫襯佢哋。

除了無晚市堂食，另一間喺銅鑼灣嘅心燒食堂，下午時段亦受影響，「4-6pm一個訂座都無」，佢哋呼籲大家考慮外賣支持。

不過，位於大角嘴的走肉．朋友日前就預告結業，「要同大家話別了。。。我哋會營業至2022年2月24日，然後正式結業！原因相信大家都知道🥺🥺」佢哋話雖然好唔捨得，但都要面對現實，仲hashtag咗「良心小店的辛酸」。

灣仔的CAFÉ RELAY前日（19日）都宣佈，決定割愛轉讓餐飲業務，「希望珍惜各區仍努力堅持的各行各業小店。」

#channelchk #小店 #禁晚市堂食 #食肆