偽香港政府温哥華粉飾太平，香港民族協會主動出擊踩場！

2022年9月，中國嘅香港傀儡政府資助疑似統戰組織加拿大中國人攝影學會喺加拿大五城市（卡加利、温哥華、温尼辟、多倫多、滿地可）舉辦攝影展，藉此推銷香港予外國人，繼而吸引佢哋去香港旅遊、投資。

9月10日，我哋一班喺温哥華嘅香港民族主義者到場示威，向偽香港政權傳遞清晰嘅訊息，表明香港人唔同意香港已恢復良政善治。喺中國帝國統治之下，自由同和平唔可以並存。

無論偽香港政府喺外國舉辦乜嘢活動都好，都係想製造香港已經恢復和平嘅景象。但呢個訊息係錯誤嘅。喺中國殖民帝國嘅高壓統治之下，愛好自由嘅香港人根本冇得發聲。佢地只可以沉默，而喺少數仍然肯挑戰權威嘅勇者被滅聲之後，就連沉默都會視為反對。

今次攝影展，係中國香港政府慶祝香港落入中國之手25週年嘅活動之一，然而香港民族協會認為中國統治唔應該慶祝，因為中國統治剝削我哋嘅人民、殖民我哋嘅土地，係香港民族嘅敵人。

我哋呼籲外國人唔好聽信中國嘅謊言，以為香港已經和平、安全。香港局勢會繼續惡化，請勿去香港旅遊、投資。

我哋呼籲海外海內香港人繼承前人遺志，肩負民族責任，着手光復香港。