2022第一季代禱信
.
.
MANNA係一個好特別嘅地方
好多人來人往, 好多意見好多想法
而2022第一次代禱信
就有樣好緊要嘅事要同大家講
.
.
唉, 是咁的
除左上一個POST講到唔用膠嘅堅持外
其實我地仲有一個位都有點堅持
而呢樣野又真係幾有爭議性
簡單講下個故事
1月27號我地食品工場嘅臨時牌就會完結
理論上, 臨時牌完左就會出正式牌
但過往經驗, 因為牌照要求又多又難
所以好小可以完美交接到
而我地嘅出牌顧問其實都係老字號
但係今一次有小小失手, 唔算係大錯
但加上食環都同我地坦誠
話呢期佢地人手真係唔夠
所以結果係, 要3月中先出到正式牌照。
.
.
我地工場做咩嘅呢?
工場有大約10位同工
係負責準備食材俾餐廳
因為香港餐廳地方唔夠, 要工場幫手
同時準備唔同社關嘅食物
例如長者飯, 清潔工支援等等
而為左營運到, 我地會接到會同散水餅
希望一如以往透過呢D服務搵到社關開支
.
.
而3月中先出到正式牌會點呢
出邊普通公司9成9會點做呢, 就係照開工
因為食環會上來罰你錢話你無牌經營
唔會拉唔會鎖, 就好似約定俗成
Buy Time去出個牌咁樣
所以當我地知道個牌又一次出唔到住
要DELAY嘅時候, 真係好大爭扎
周邊大部份朋友都話
“照俾錢照開門啦”
“其實同周街泊車差唔多”
而我地都會諗, 如果工場開唔到
班同工點算呢? 門鋪又點算呢?
近來又疫情, 真係好難生存
所以其實都好想照開工罰錢等出牌
起碼到會接得一單得一單幫補下都好
.
.
但最後我地決定27號工場會停工
事關有位長輩同我地講
“如果呢個係生意, 你點決定都可以”
“但如果呢個係事奉, 你怕嘅係得罪天父”
“你就應該盡力做到無可指責”
而其實, 我地問左食環
佢話即使我地無牌
其實免費野社關野係可以照做
只係唔可以做搵錢嘅野
例如供應食材俾門鋪, 到會果D就唔可以
阿長輩知道左後, 再下一城
“你本來召命係扶貧社關, 唔係攪營運”
“明白營運係必須, 但只係個方法”
“其實你宜家會戰扎, 係因你你怕執怕營運死左”
“而唔係怕自己回應唔到個召命”
“你係軟弱嘅未認左佢囉”
“我最怕嘅, 就係有一日你會隨流俗去”
.
.
其實我地知道不論點做
都會有一支持有人反對
唔理照做可能有人話我地犯法, 無信心
唔做住可能會有人話我地唔諗後果影響成隊人生計
話我地離地耶L死守律法
我地知道都有好細細咁平衡過
最後落左呢個決定, 唔求大家明白哂
但都想大家支持我地呢個決定
.
.
再講落去就太長, 結果係
我地認左錯, 知道左應該盡力做到無可指責
始終我地唔想俾人話
【基督教機構以社關作藉口犯法無牌經營】
所以1月27號到3月點算, 點支持下去
我真係唔知
呢個可能係MANNA 6年來最大一次危機
你可以為我地代禱嗎?
.
.
#IfYouCare
#你嘅代禱最重要